Улаанбаатарт бороо орсон өдөр замын хөдөлгөөний түгжрэл ихэсч, замууд тэг зогсолттой болдог. Өнөөдөр ч мөн гол замууд тэг зогсолттой байгаа бөгөөд зайлшгүй шаардлагагүй тохиолдолд машингүй явахыг зөвлөж байна. 18:00 цагаас хойш замуудад автомашины түгжрэл ихэсч, нийтийн тээвэр болон бусад эгнээний машинууд нэг байршилдаа 40-60 минут болж байгааг жолоочид хэлж байгаа юм.

Замын хөдөлгөөний удирдлагын төвийн цахим хуудасны нөхцөл байдлын мэдээллээс харахад ТБД андуудаас нэгдүгээр сургууль хүртэлх зам, Шангрилла зочид буудлын хажуугийн зам, Тэнгис кино театр, Жуковын музейн урд талын гол замуудад 5 км-ээс доош хурдтай буюу тэг зогсолттой байна.

Харин СУИС, МУИС, Бага тойруу, Хавдар судлалын үндэсний төвийн замууд 10 км хурдтай буюу улаан өнгийн тэмдэглэгээтэй харагдаж байгаа юм. Иймд та бүхэн замын хөдөлгөөний мэдээллийг сайтар авч, аль хэсгээр зорчиж хөдөлгөөнд оролцохоо тооцоолж гарахыг зөвлөж байна. Замын хөдөлгөөний мэдээллийг энд дарж харна уу.