Нийслэлд өнгөрсөн долдугаар сарын 5-7-нд үргэлжлэн орсон борооны улмаас Сэлбийн бүс дэх айлууд усанд автаж, голын ус үерлэж, далангаа давсан. Улмаар ойролцоох байр, хотхонуудын зоорийн давхарт ус нэвчиж, борооны дараа соруулахаас өөр аргагүй болсон билээ. Тухайн үед Сэлбийн голын хаяанд барилга барьж буй компани өөрийн хөрөнгөөр усыг соруулах арга хэмжээ авсан бөгөөд энэ үед Нийслэлийн онцгой комисс нөхцөл байдал дээр нь ажиллаж байв.

Үерийн эрсдэлтэй бүсэд ус зайлуулах техник хэрэгсэл нэн шаардлагатай байсан бөгөөд тухайн үед хотын дарга Д.Сумъяабазар болон холбогдох албаныхан хувийн хөрөнгөөр генератор түрээсэлж байсан Натурын гүүрний хажуу талын аж ахуй нэгжээс техникийг түр хэрэглүүлэхийг хүссэн. Гэвч зардал хөрөнгөө тухайн нэгж өөрөө хариуцаж байгаа учир нийслэлийнхэнд тоног төхөөрөмжөө ажиллуулахаас тэд татгалзсан юм. Тэгвэл энэ асуудлаас болж Хотын дарга тухайн аж ахуй нэгжийн барилгын ажлыг зогсоох мэдэгдэл хүргүүлжээ.

Энэ шийдвэртэй холбоотой барилгын ажлыг гүйцэтгэгч компанийн удирдлага "Хотын даргад нөхцөл байдлаа учирлаж тайлбарласны эцэст занаанд орж ажлаа зогсоолгов. Надад өгөх помп байгаагүй, түрээсийн генератор л байсан" гэв.

АЖ АХУЙ НЭГЖИЙГ ЗАНАЛХИЙЛЖ, ҮЙЛ АЖИЛЛАГААГ НЬ ХЯЗГААРЛАСАН ЗҮЙЛ БАЙХГҮЙ

Харин Нийслэлийн Засаг даргын хэвлэлийн төлөөлөгч Н.Сугар энэ асуудалд тайлбар өгөхдөө "Хотын дарга болон холбогдох албаны хүмүүс үерийн нөхцөл байдал дээр шуурхай ажиллаж байх үед аж ахуй нэгжээс хэрэглэж байсан помпыг нь түр хэрэглүүлэх боломжтой эсэхийг асуусан. Тухайн үеийн лайв бичлэг ч бий.

Аж ахуй нэгж түрээсэлж байгаа техник хэрэгслээ хэрэглүүлэх боломжгүй гэсний төлөө Хотын дарга бухимдсан зүйл огт байхгүй. Холбогдох албаныхан тухайн барилгыг үерийн эрсдэлтэй бүсэд, стандарт шаардлага зөрчиж баригдаж байгаа учраас ажлыг нь түдгэлзүүлэх шийдвэр гаргасан.

Түүнээс аль нэг аж ахуй нэгжийг заналхийлсэн, санаатайгаар үйл ажиллагааг нь хязгаарлаж байгаа зүйл байхгүй" гэсэн юм.

“МАГНУС СЕНТУРИОН КОНСТРАКШН” ХХК-ТАЙ ГОМДОЛ ИРГЭДЭЭС ИРСЭН

“Магнус сентурион констракшн” ХХК-тай гомдол иргэдээс ирсэн бөгөөд үүний дагуу холбогдох албаныхан албан шаардлага хүргүүлж Натурын гүүрний хажууд байрлах тус компанийн ажлыг түдгэлзүүлэх шийдвэр гаргасан байна. Бид тус компанитай холбогдоход тухайн барилгын ажлыг гүйцэтгэгч нь өөр нэгж ажиллаж байгаа гэх хариултыг өглөө.

Хотын стандарт, хяналтын газрын дарга С.Төмөрдуламын хэлснээр "Наймдугаар сарын 1-нээс эхлэн “Магнус сентурион констракшн” ХХК-тай холбоотой гомдол иргэдээс ирсэн. Дамдинсүрэнгийн гудамжны авто замд цууралт үүссэн тул тус компанид авто замын гагнаас, ирмэг хэлхээг сайтар хийсний дараа ажлаа үргэлжлүүлэх шаардлага хүргүүлсэн юм. Улмаар тус байршилд иргэдийн аюулгүй байдлыг хангах зорилгоор барилгын ажлыг түр түдгэлзүүлэх Нийслэлийн Засаг даргын захирамж гарсан. Барилгын тухай хууль, Авто замын тухай хуульд барилгын ажил гүйцэтгэж буй компани орчны аюулгүй байдлыг бүрдүүлэхээр заасан байдаг. Барилгын тухай хуулиар барилга, байгууламжийг замаас 50 метрийн зайд байх ёстой боловч тус компанийн барилга зам руу орж, нурах эрсдэл үүсгэсэн.

Иймд “Магнус сентурион констракшн” ХХК-д албан шаардлага хүргүүлсэн бөгөөд өнөөдөр буюу наймдугаар сарын 14-ний дотор эргийн бэхэлгээ, зам дээрх гагнаас хийсэн байдал, иргэдийн аюулгүй байдлыг хангасан эсэх, барилгын ажлыг үргэлжлүүлэх боломжтой эсэхэд хяналт, шалгалт хийнэ" гэсэн.

Харин цахим хуудастаа мэдээлэл бичсэн иргэн аж ахуй нэгжид хотын удирдлага өс санаж санаатайгаар ийм нөхцөл байдал үүсгэсэн гэж байгаа ч холбогдох хүмүүс үүнийг үгүйсгэж байгаа юм.