Монголын тулааны шилдэг тамирчдын холбооны 57 кг жингийн хошой аварга, ард олондоо "Ардын хүү" хэмээн хүндлэгдсэн О.Пүрэв агсны гэр бүлийг орон сууцтай болгох хандивын аяныг нөхөд нь санаачлан өрнүүлж буй. Хандивын аяны талаар "Rebel Grappling" клубын чөлөөт, жюү жицү бөхийн тамирчин, дасгалжуулагч Б.Мөнхбаатартай ярилцлаа. 

-Найзынхаа хүсэл мөрөөдлийг биелүүлэхээр спортын тамирчид нэгдэн, хандивын аян өрнүүлж байна. Анх хэрхэн О.Пүрэв агсантай танилцаж байв?

-Миний хувьд О.Пүрэвийг 2014 оноос мэднэ. Хамт нэг клубт бэлтгэл хийж, хичээллэдэг байсан. Анд найзаа анхны аваргын бүсээ авахад нь хамт огшоод байлцаж байсан дэвжээний сайхан найзууд. Найз минь мэргэжлийн холимог тулааны оргил болохын төлөө сэтгэл шулуудсан байсан. Тэрээр "MGL-1 FC" холимог тулааны 57 кг жингийн хошой аварга болсон. Мөн "One Championship" тэмцээнд найман ялалт байгуулсан.

Цаашдаа дэлхийн аварга болох том зорилго өвөртөлж байлаа. Дараагийн мөрөөдөл нь өрх гэрийн тэргүүн хүний хувьд хоёр хүүхэд, эхнэрээ байр орон сууцанд оруулах байсан.

-Хандивын аяныг нь иргэд, байгууллага хэр дэмжиж байна вэ?

-Өөрийнх нь хүсэл мөрөөдөл байртай болох байсан. Тэр хүсэл мөрөөдлийг нь биелүүлэхээр Монголын тулааны урлагийн бүх залуус, тамирчид нэгдэн хандивын аян өрнүүлж байна. Та бүхэн маань бидэнтэй нэгдэхийг уриалъя. Миний хувьд "Fairtex" брэндийг Монголдоо албан ёсоор борлуулдаг. Энэ бүтээгдэхүүнээ онлайнаар дуудлага худалдаанд оруулж, үндсэн үнээс 50 хувь хямдруулсан үнээс эхлүүлж байгаа. Дуудлага худалдаанаас орж ирсэн орлогыг 100 хувь хандивын аянд нэмэрлэх болно. Ойр дотны найз нөхөд нь аянд чин сэтгэлээсээ тусалж байна.

Одоогийн байдлаар 40 орчим сая төгрөг цугларч, 40 хувьтай үргэлжилж байна.

-О.Пүрэв агсныг их хөдөлмөрч, сайхан сэтгэлтэй хүн байсныг ард түмэн мэднэ. Найзынхаа тухай сайхан дурсамжаас хувцаалцахгүй юу?

-Тэр миний мэдэхийн хамгийн шударга, хөдөлмөрч нэгэн байсан. Анх танилцсан мөчөөсөө зан араншин нь огт хувираагүй. Хэзээд нэг л зангаараа, бусдыг хүндэлж, хайрлаж чаддаг, дайчин, жинхэнэ мэргэжлийн тулаанч байлаа. Найз маань маш нэрэлхүү зантай. Хүнээс үнэгүй юм авах дургүй. Мөнгийг нь төлж авна гэдэг тийм л шударга залуу. Би сүүлд зарж, борлуулж байгаа бүтээгдэхүүн, бээлий өгье гэхэд аваагүй. Тэгэхээр нь гар ороодог бент өгч байсан. Өөрөө хөдөлмөрийн үнэ цэнийг маш сайн ойлгодог байсан учраас бусдыг ч гэсэн их хүндэлж, хайрладаг байсан найз минь.

Би бөх барилддаг болохоор надтай барилдааны бэлтгэл их хийнэ. Заримдаа өчилт, боолт хийнэ. Талийгаач маань ерөөсөө бууж өгөхгүй, их гүрийнэ. Сүүлд барилдахад барилдаан нь сайжирч, бяртай болсон байсан.

Сүүлд зургадугаар сард утсаар ярихад сэтгэл санаагаар жаахан унасан байсан. Тэр үед "Хашаанаасаа гэрээ нүүлгэх гэж байна" гэхэд нь "Би очиж туслах уу" гэсэн "Болгочихлоо баярлалаа" гэж байсан.  Хашаагаа түрээсэлдэг байсан юм.

-Найзыгаа анхны аваргын бүсээ авахад нь байлцаж байсан гэлээ. Тэр мөчийг эргэн дурсвал?

-Анхны "MGL-1 FC" холимог тулааны тэмцээн 2014 онд Улсын циркийн байранд болж байсан. Би тухайн үед Гурвалжингийн барилгын материалын захаас обой худалдаж аваад, дээр нь нэрийг нь бичиж, хөгжөөн дэмжсэн. Тэрэнд их баярладаг байсан юм шиг байна лээ. Тэр үед аваргын бүс гэж байгаагүй учраас дараа нь нөхөж олгосон. Тэгэхэд ойр дотны найз, дасгалжуулагч багш нараа дуудаж, аваргын бүсээ гардан авч байлаа. Талийгаач маань архи, тамхи хэрэглэдэггүй, шоу цэнгээнд явдаггүй их даруухан хүн байсан. Тийм учраас анхны аваргын бүсээ гардаж аваад л баяр хүргээд л тарцгаасан.