Богдхан уулын дархан цаазат газраас цахим орчинд иргэдийн нийтэлж буй тусгай хамгаалалттай газарт зөвшөөрөлгүй газар ухаж байгаатай холбоотой мэдээлэлд тайлбар хийлээ. Тодруулбал, сүүлийн өдрүүдэд цахим орчинд “Тэнгэрлэг монгол” ТББ, иргэн Г.Ганхуяг нарын оруулаад буй асуудлаар газар ашиглалттай холбоотой мэдээллийг гаргасан байна. Богдхан уулын Залаалтын амны хязгаарлалтын бүсэд Байгаль орчин аялал жуулчлалын сайдын 2020 оны долдугаар сарын 2-ны А/523 дугаар тушаалаар “Цэлмэг тэнгэр трейд” ХХК-нд газар ашиглах эрх олгожээ. Мөн сайдын 2022 оны есдүгээр сарын 6-ны А/369 дүгээр тушаалаар газар ашиглах эрхийг хүчингүй болгосон байна. Тухайн аж ахуйн нэгж шүүхийн маргаан үүсгээд байгаа аж.

Мөн сайдын 2023 дөрөвдүгээр сарын 27-ны 01/16 дугаар хяналт шалгалтын удирдамжийн дагуу хяналт шалтгалт явуулж “Ойн тухай хууль”-ийн 8 дугаар зүйлийн 8.6-д “Хамгаалалтын бүсийн ойд зам, гүүр барих, ус, эрчим хүч, холбооны шугам татах болон түймрээс хамгаалах шороон зурвас гаргах, ойн хэвийн өсөлт, нөхөн сэргэлтийг дэмжихэд чиглэгдсэн арчилгаа, цэвэрлэгээний арга хэмжээг хэрэгжүүлэх, ойн дагалт баялгийг ашиглахаас бусад үйл ажиллагаа явуулахыг хориглоно”, 29.1.10-д “ойн сангийн газарт улсын тусгай хэрэгцээний болон ойн аж ахуйн арга хэмжээг хэрэгжүүлэхээс бусад зориулалтаар барилга байгууламж барих, аливаа объект байрлуулах” заалтуудыг тус тус зөрчсөн нь тогтоогдсон тул газар ашиглах эрхийг хүчингүй болгох саналыг хүргэсэн байна.