Украины арми байлдааны талбарт шархадсан цэргүүдээ карго дроноор тээвэрлэж байгааг "The Economist" сэтгүүл мэдээлэв. Энэ нь урьд өмнө аль ч тулааны талбарт байгаагүй үйл явдал юм. Тэдгээр дрон нь 180 кг ачааг 70 хүртэлх км зайд тээвэрлэх чадвартай. Хэчнээн цэргийг ийм аргаар тээвэрлэсэн, нутгийн аль хэсэгт гэдэг нь тодорхойгүй.

Дайн эхэлснээс хойш нас барсан, шархадсан цэргүүдийн тоо тогтмол өссөөр буй. АНУ-ын Батлан хамгаалахын тагнуулын агентлаг дөрөвдүгээр сард тооцоолохдоо 2022 оны хоёрдугаар сараас хойш нийт 113,500 украин цэрэг, 180 мянган орос цэрэг шархадсан гэжээ. Гэхдээ талууд хэн нь ч хохирлынхоо талаар тодорхой мэдээлдэггүйг дурдах нь зүйтэй.

Шархадсан украин цэргүүдийг фронтын шугамаас алслагдсан баруун Украин болон Европын бусад орон руу галт тэргээр тээвэрлэж хүргэсний дараа эмчилдэг. Тэгвэл цэргүүдийг ийнхүү дрон ашиглан тээвэрлэж эхэлсэн нь Украины арми шинэ технологийг хэрхэн ашиглаж буйн тод жишээ юм.

Эх сурвалж: BUSINESS INSIDER