Азийн улс төрийн намуудын олон улсын бага хурал /International Conference of Asian Political Parties/ 2023 оны наймдугаар сарын 4-7-ны өдрүүдэд Улаанбаатар хотноо зохион байгуулж байна. Азийн улс төрийн намуудын хамтын ажиллагааг таниулан сурталчлах, Азийн улсуудын итгэлцэл, харилцан ойлголцлыг сайжруулах, улс төрийн намуудын бүсийн хамтын ажиллагааны харилцаа холбоог идэвхжүүлэх зорилготой ICAPP нь 2000 онд үүсгэн байгуулагдсан ба одоогоор Ази тивийн 49 орны улс төрийн намуудын гишүүнчлэл бүхий байгууллага юм.

Тус хуралдааны үеэр Азийн улс төрийн намуудын олон улсын залуучуудын байгууллагын шинэ тэргүүнийг сонгосон бөгөөд олон улсын төлөөлөгчдийн саналаар УИХ-ын гишүүн, Засгийн газрын гишүүн, ЦХХХ-ны сайд Ням-Осорын Учралыг сонгожээ. Ийнхүү Н.Учрал Азийн 49 орны улс төрийн намуудын залуусын байгууллагыг удирдан ажиллахаар боллоо. Монгол ардын намаас 2004 оноос тус байгууллагын үйл ажиллагаанд идэвхтэй оролцож 2013 оноос эхлэн Байнгын хорооны гишүүнээр сонгогдон ажиллаж байна.

Хуралдаан цар тахлын дараах нийгэм-эдийн засгийн ахиц дэвшлийн төлөөх нийгмийн яриа хэлэлцээнд залуучуудыг татан оролцуулах, цар тахлын дараах сэргэлтийг жендерийн мэдрэмжтэй өрнүүлэх, эмэгтэйчүүдийн манлайллыг дэмжих сэдвээр үргэлжилж байна.