Баянгол дүүргийн 18 дугаар хороонд байрлах хуучнаар "Амур" зочид буудал байсан таван давхар барилгыг нурааж, 16 давхар зочид буудал барихаар үйл ажиллагааг нь эхлүүлээд байсан ажлыг ойролцоох оршин суугчид нь эсэргүүцэж жагссан. Оршин суугчдын зүгээс тус барилгын ажлыг эхлүүлж хөрсийг ухаж байгаа нь бусад ойролцоох орон сууцнуудыг нурах эрсдэлд хүргэж байгаа төдийгүй явган хүний зам хаасан, барилгын стандартын шаардлага хангаагүй зэрэг зөрчилтэй болохыг удаа дараа мэдэгдсэн. Мөн хуулийн байгууллагад хандаж, оршин суугчдын амгалан тайван байдлыг алдагдуулсан талар гомдол өгсөн гэсэн юм.

Тодруулбал, барилга баригдсанаас хойш хөрсний нуранги үүссэнээс болж ойр орчмын орон сууц нурах эрсдэлтэй болсон тул аюулгүй байх баталгаа гаргаж өгөхийг оршин суугчид шаардаж байгаа юм. Тиймээс тус газрыг оршин суугчдын аюулгүй байдлыг хангаж, холбогдох стандарт шаардлагад нийцүүлэх хүртэл барилгын ажлыг түр зогсоох хэрэгтэй гэж үзэн холбогдох байгууллагуудад шаардлага хүргүүлэхээр болсон байна.

Барилгын ажлын зөвшөөрлийн гэрчилгээг олгосон, Хот байгуулалт хөгжлийн газрын хяналтын хэлтсийн дарга М.Идэрбаатар:
–Амур-Оргил ХХК-ийн энэхүү газрыг олгоход зөвхөн Хот байгуулалт, хөгжлийн газар биш төрийн олон байгууллагын зөвшөөрлөөр олгогдсон. Загвар зураг батлагдаж дөрвөн техникийн нөхцөл буюу ус, дулаан, цахилгаан, холбооны нөхцөл хангагдаж байвал зөвшөөрөл олгодог.