АН: Орон нутагт татвар, торгуулиар иргэдээ мөлждөг байдал хэрээс хэтэрлээ

Ардчилсан нам 4/11 мэдээллийн цагаараа Хөвсгөл аймагт зохион байгуулагдсан Хангайн бүсийн "Эдийн засгийн форум"-ын талаарх мэдээлэл болон цаг үеийн асуудлаар мэдээлэл өглөө.

АН-ын ХЭГ-ын дарга Н.Лхагвадорж:

-АН-ын зүгээс Монгол Улсын 21 аймаг, 9 дүүрэгт байгаа нийт гишүүд дэмжигчдийнхээ дуу хоолойг сонсохын өнгөрсөн хугацаанд Л.Гантөмөр даргын зүгээс “ гишүүдээ дэмжье” аяныг эхлүүлсэн. Энэ долоо хоногоос эхлэн 21 аймгаа бүсчлэн, хангайн , төвийн баруун, зүүн, өмнөд бүс гэсэн байдлаар гишүүд дэмжигчид, бизнес эрхлэгчдийн дуу хоолойг сонсохын тулд Эдийн засгийн форумыг зохион байгуулж байна. Хөвсгөл аймагт болсон Эдийн засгийн форумд нийтдээ таван аймаг буюу Хөвсгөл, Булган, Дархан-Уул, Орхон, Сэлэнгэ аймгийн 750 гаруй хүн оролцлоо. Тэдний дийлэнх нь залуус байлаа. Тэдний саналыг дүгнэвэл төрийн бодлого хөрсөн дээрээ буухгүй байгаад шүүмжлэлтэй байна. Төрд итгэх итгэл унасан байна. Гуравдугаарт, бизнес эрхлэх орчин орон нутагт бүрдээгүй. Ялангуяа орон нутагт улс төр, намын ялгаварлан гадуурхалт их байна.

Эрх баригч МАН-ын зүгээс эдийн засаг тогтвортой өсч байгаа гэх боловч энэхүү өсөлт нь орон нутагт үр дүнгээ өгөхгүй байгаа талаар форумд оролцогчид дуу нэгтэй санал хэллээ. Өөрөөр хэлбэл Засгийн газрын зүгээс асар их дарамтыг бизнес эрхлэгчдэдээ үзүүлж байна. Өнөөдөр татвар, торгууль, иргэдээ мөлждөг асуудал хэрээс хэтэрлээ гэх саналыг мөн илэрхийлсэн.

АН-ын гишүүн З.Нарантуяа:

-Сүүлийн долоон жилийн хугацаанд энэ улсын эдийн засаг, нийгэмд бодитой өөрчлөлт шинэчлэлт гарсангүй. Эдийн засаг зөвхөн нүүрсний экспорт дээр оршин тогтнож байгааг стратеги судалгааны хүрээлэнгийн судалгаа нотолж байгаа. Аливаа улс төрийн нам тууштай алсын хараагүй, тогтвортой зорилгогүй бол зөвхөн дөрвөн жилийн хугацаанд сонгуулийн амлалтынхаа хойноос хий хөөсөрч давхиад урт хугацааны макро эдийн засгийн бодлогыг орхигдуулдаг гэдгийг тоогоор хэлж байна. Төсвийн орлогын 80 гаруй хувийг татварын орлогоос бүрдүүлж байна. Энэ юуг хэлж байна уу гэхээр ажил хийж буй хэдэн хүний татварыг хурааж нөгөө талдаа төрийн нүсэр албыг санхүүжүүлэх чөтгөрийн тойрогт орсон, тогтолцоонд амьдарч байна. Үүнд ямар ч хөрөнгө оруулалт, хөгжлийн томоохон төслүүдийг хөгжүүлэх, түүнд зарцуулсан хөрөнгө харагдахгүй байна. Эдийн засаг буруу замаар явж байна. Намууд зөвхөн амлалтдаа хөтлөгдөж төсвийг ямар үрэлгэн зарцуулж байгааг харж болохоор байна. Шинэчлэн батлагдсан улс төрийн намын хуулиар намуудыг маш тодорхой зорилттой, улс орныг хөгжүүлэх бодлогын хөтөлбөртэй байхыг шаардаж байгаа. Тиймээс дэргэдээ бодлогын судалгааны хүрээлэнтэй байхыг шаардаж байна.