Говь-Алтай аймгийн Засаг дарга О.Амгаланбаатар яг жилийн өмнө аймагтаа ганц бие залуучуудын танилцах уулзалтыг санаачлан зохион байгуулж байв.  Түүний зохион байгуулж буй уулзалтад 300 гаруй ганц бие залуус оролцсон тухай мэдээлж байсан юм. Эдгээр залуусын уулзалтаар 30 гаруй хос төрсөн байна. Тэдний төлөөлөл гурван хос өнөөдөр /2023.08.02/ Хантайшир-100 баяр наадмаар хуримлажээ.

Аймгийн Засаг дарга О.Амгаланбаатар жилийн өмнө мэдээлэл хийхдээ "Миний хувьд аймгийн Засаг даргаар томилогдсон цагаас аймгийнхаа 86 багаар явж, нарийн мэргэжлийн эмч нартай хамт иргэдтэй уулзсан. Ингээд явахад улсын хэмжээнд сүүлийн 30 жил огт хүнээ бодсон бодлого алдагдсан байна гэдэг нь харагдсан. Хөдөө багийн иргэдэд эмч үзлэг хийхэд 20, 30 настай залуус цусны даралт ихтэй, огт эмнэлгийн үйлчилгээ аваагүй байх жишээтэй.

Мөн иргэдийн хувь хүний хөгжилд огт анхаарч ирээгүй байгаа нь ажиглагдсан. Тиймээс иргэдээс санал хүсэлт авахад залуус хоорондоо танилцаж, уулзах арга хэмжээг зохион байгуулах хүсэлтийг ихээр тавьсан. Энэ оны наймдугаар сарын 12-14-ний өдрүүдэд "Дөргөн нуур" жуулчны баазад Алтайн залуусын чуулга уулзалтыг зохион байгуулах гэж байна. Энэ уулзалтад 300 гаруй хүн бүртгүүлсэн" тухай ярьж байв.