Улаанбаатар хотоос Архангай аймгийн чиглэлд аялж явсан иргэн өнгөрсөн шөнө Архангай аймгийн Өндөр-Улаан сумын Чулуутын хавцлаас хөл алдаж унасан байна. Тодруулбал, 30 настай иргэн Чулуутын хавцлаас хөл алдан унаж сураггүй болсон тухай дуудлагыг Онцгой байдлын байгууллага 2023 оны долоодугаар сарын 27-ны өдрийн 23:05 цагт хүлээн авчээ.

Тус аймгийн Онцгой байдлын газрын Тариат сум дахь Эрэн хайх, аврах бүлгийн алба хаагчид очиж, тухайн иргэнийг эрэн хайх, аврах ажиллагааг зохион байгуулсан бөгөөд өнөө өглөө буюу 2023 оны долоодугаар сарын 28-ны 06:24 цагт Чулуутын хавцлаас цогцсыг олж гарган аймгийн Цагдаагийн газрын мөрдөгчид шилжүүлэн өгсөн байна.

Үүнээс гадна өнгөрсөн хоногт нийслэлийн хэмжээнд голын усны ослын хоёр дуудлага мэдээллээр Аврах ангийн алба хаагчид үүрэг гүйцэтгэлээ.

Тодруулбал, Хан-Уул дүүргийн 8 дугаар хороо, Сонсголонгийн гүүрний хажууд 15 настай эрэгтэй хүүхэд живчихлээ гэх дуудлагыг 19:01 цагт ирүүлснээр Аврах ангийн бүрэлдэхүүнийг очиход 15 настай эрэгтэй усанд хөл алдан урсаж, голын салаанд тээглэсэн байдалтай байсныг эсэн мэнд гаргаж аюулгүй байдлыг хангасан.

Мөн Хан-уул дүүргийн 11 дүгээр хороо, Маршалын гүүрийн доор Туул голын эрэг дээр хүн сууж байгаад алга болчихлоо гэх дуудлагыг 13.50 цагт ирүүлснээр Аврах ангийн бүрэлдэхүүнийг очиход 37 настай эмэгтэй Маршалын гүүрээс баруун зүгт 500 метрийн зайд голын дунд хэсэгт нас барсан байдалтай байсныг гаргаж цагдаагийн байгууллагад хүлээлгэн өглөө.

Цаг уурын байгууллагаас ойрын өдрүүдэд халалт үргэлжилж, түр зуурын аадар бороо орохыг мэдээлж байна.

Иймд голын эрэг дагуу амарч, зорчихдоо бага насны хүүхэд, хөгжлийн бэрхшээлтэй болон өндөр настай хүмүүсийн аюулгүй байдлыг ханган, анхаарал болгоомжтой байхыг сэрэмжлүүлж байна.