Нэр хүнд, хамрах хүрээ, үзэгч фанатуудын тоо, өрсөлдөөн зэргээрээ Европын топ лигүүдийн тоонд зүй ёсоор багтах Испанийн хөлбөмбөгийн Примера лига болон Италийн Сери А лигүүд өнгөрөгч бямба гаригт хөшгөө нээлээ. 80 дахь удаагаа зохион байгуулагдаж буй 2010-11 оны Ла лигийн шинэ улирлын тоглолтууд албан ёсоор 28-нд нээлтээ хийж, эхний өдөр Испанийн хөлбөмбөгийн ногоон талбайд гурван тоглолт болж, өндөрлөсөн юм. Дашрамд сонирхуулахад, энэ улиралд Ла лигийн бүх тоглолтод Nike T90 Tracer гэх шинэ бөмбөгийг ашиглах учиртай. Харин Италийн Сери А-гийн тухайд эхний өдөр хоёр тоглолт өрнөж, “Удинезе” талбайдаа “Генуя”-д хожигдсон бол өнгөрсөн улирлын дэд аварга “Рома” Олимпийн цэнгэлдэхэд “Чезена”-тай гоолгүй тэнцсэн.

Ла лигийн шинэ улирлыг нээж, эхний өдөр “Валенсия”, “Атлетико Билбао”, “Севилья” нар анхны ялалтаа авсан юм. “Валенсия” 3:1-ээр “Малага”-г буулган авсан бол “Атлетико Билбао” топ дивизонд шинээр хөл тавьсан “Эркулес”-ийг 1:0 харьцаатай буулган авч, хожлын гурван оноогоо авчээ. Мөн “Севилья” 4:1-ээр “Леванте”-г хожсон байна.

Харин өчигдөр Ла лигийг тодорхойлогч “Барселона” болон “Реал Мадрид” клубууд эхний тоглолтоо хийсэн. Өнгөрсөн улирлын аварга “Барса”-гийн тухайд “Расинг Сантандер”-ийг талбайд нь 3:0-ээр бут ниргэсэн бол Жозе Моуриньогийн “Реал Мадрид” “Реал Мальорка”-тай гоолгүй тэнцсэн байна. Пеп Гуордиалагаар удирдуулсан “Барса”-гийн довтлогч Лионель Месси, Андрес Иньеста, Давид Вилья нар гоолджээ.

Өчигдөр болсон эхний тойргийн бусад тоглолтын дүнг танилцуулбал, “Реал Сосьедад” 1:0-ээр “Вильяреал”-ыг, “Эспаньол” 3:1-ээр “Хетафе”-г тус тус хожсон бол “Осасуна”, “Альмерия”-тай, мөн “Депортиво ла Коруна”, “Реал Зарагоза”-тай тус тус гоолгүй тэнцэж, оноо хуваажээ.

Харин энэ үеэр Италийн ногоон зүлгэнд Сери А лигийн эхний тойргийн тоглолтууд мөн үргэлжилж, “АС Милан” шинэ дасгалжуулагч Массимилиано Аллегригийн удирдлага дор анхны хожлоо авсан юм. Тэд “Лечче”-г 4:0-ээр бут ниргэжээ.

Сери А лигийн өчигдөр болсон бусад тоглолтын дүн:

“Кьево” – “Катания” 2:1
“Фиорентина” – “Наполи” 1:1
“Палермо” – “Кальяри” 0:0
“Парма” – “Брешия” 2:0
“Сампдория” – “Лацио” 2:0
“Бари” – “Ювентус” 1:0

С.Цэлмэг