Олон улсын контент бүтээгч "Nas Daily" багийнхан наймдугаар сарын 19-нд Монгол Улсад ирж, “Nas Summit” арга хэмжээгээ зохион байгуулахаар төлөвлөөд байна. Тус арга хэмжээнд "Nas Daily" багийнхан болон "Youtube" сувагт олон сая дагагчтай контент бүтээгчид оролцож, туршлагаасаа хуваалцах юм.

"Nas Academy"-ийн үүсгэн байгуулагч Нусейр Ясины хувьд инстаграм хуудсандаа Монголд ирэхийг 10 жилийн өмнөөс мөрөөдөж байсан тухайгаа онцолсон байдаг. Хөтөлбөрийн хүрээнд олон дагагчтай, нөлөөлөгч нарыг эх орондоо урьж, гадаадад сурталчлах ажлыг Байгаль орчин, аялал жуулчлалын яам, Соёлын яамнаас зохион байгуулахаар болжээ.

Монгол Улсын Засгийн газрын 2022 оны 264-р тогтоолоор 2023-2025 оныг "Монголд зочлох жил" болгон зарласан. Түүнчлэн мөн оны Монгол Улсын Засгийн газрын 371-р тогтоолоор Аялал жуулчлалыг хөгжүүлэх Үндэсний хороо байгуулж, Ерөнхий сайд Л.Оюун-эрдэнэ тэргүүлэн ажиллах юм.

Арга хэмжээнд дотоодын болон олон улсын 1000 гаруй контент бүтээгч оролцох бөгөөд Монгол руу чиглэсэн томоохон контент бүтээх арга хэмжээг зохион байгуулна.

Энэхүү дээд хэмжээний уулзалт нь дотоодын контент бүтээгчдэд олон улсад хамтын ажиллагаагаа болон дэлхийн бүс нутгийн брэндийн хэлцлийг баталгаажуулах завшаан болох бөгөөд дотоодын контент бүтээгчид олон улсын илтгэгчидтэй нэг тайзан дээр гарснаар олон улсын хэмжээнд хүрээгээ тэлэх боломж бүрдэх юм.

“Nas Summit-2023” арга хэмжээнд олон улсын 20 гаруй контент бүтээгчид илтгэгчээр оролцох бөгөөд эдгээр контент бүтээгчдийн нийт дагагчдын тоо 300 орчим сая. Монгол Улсад “Nas Summit-2023” чуулга уулзалтаа зохион байгуулсны дараа манай орноор аялж,  “Нүүдэлчин Монгол-2023” соёлын биет бус өвийн Их наадамд зочлон Монгол соёлын өв, ахуй уламжлалтай танилцаж түүгээр контент бүтээж дэлхий дахинаа түгээн дэлгэрүүлэх юм.

Л.ЭНХТУУЛ