Чингүнжавын гудамжны эвдэрсэн авто замыг цэвэрлэж байна

НЭМЭЛТ:

Өнөөдөр орсон хүчтэй аадар борооны улмаас нийслэлийн зарим авто зам эвдэрсэн. Тус байршлуудад Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.Сумъяабазар холбогдох албаныхны хамт ажиллаж байна.

Тодруулбал, Чингүнжавын гудамж буюу 25-р эмийн сангаас Өргөө кино театр руу өгсөх зам эвдэрч, замын асфальт хучилтууд хууларч урссан. Тус замыг 2006 онд тавьсан бөгөөд 2019 онд үерийн улмаас эвдэрснийг засварлан, нөхөн сэргээж байжээ. Тус авто замд Баянгол дүүргийн Онцгой комисс, Нийслэлийн Замын хөгжлийн газар болон тухайн хэсгийг хариуцсан зам засвар, арчлалтын компанийн албан хаагчид ажиллаж, асфальт, хог хаягдлыг цэвэрлэн, зөөж байна.

Баянгол дүүргийн Засаг даргын орлогч Д.ЖАРГАЛСҮРЭН:

-Баянгол дүүргийн хувьд бэлэн байдалд байсан бөгөөд дүүргийн Онцгой комисс бүрэн бүрэлдэхүүнээрээ ажиллаж байна. Авто замын эвдэрсэн хэсгүүдэд яаралтай арга хэмжээ аван, цэвэрлэх ажлуудыг зохион байгуулж байгаа. “Барс” худалдааны төвийн хажууд, “Вояж” зочид буудлын ойролцоох авто зам цөмөрснийг шороогоор дүүргэж, яаралтай арга хэмжээ авсан. Харин Чингүнжавын гудамж дахь авто замын эвдрэлээс үүссэн хог хаягдлыг өнөө шөнөдөө цэвэрлээд, бороо зогсож, ус татарвал яаралтай нөхөн сэргээх үүргийг Хотын дарга өглөө. Мөн өмнөх удаагийн үерийн үеэр Дунд гол орчмын даланг хүчитгэсэн тул энэ удаад нөхцөл байдал хэвийн байгаа. Түүнчлэн дүүргийн хэмжээнд эрсдэлтэй барилга байгууламжуудыг тогтоон, эрсдэлийн үнэлгээг гаргахаар ажиллаж байна хэмээв.

Нийслэлийн Засаг дарга бөгөөд Улаанбаатар хотын Захирагч, Нийслэлийн онцгой комиссын дарга Д.СУМЪЯАБАЗАР:

-Одоогийн байдлаар УБЦТС, Улаанбаатар хотын Орон сууц, нийтийн аж ахуйн удирдах газар, УСУГ дээр Ажлын хэсэг гарган, ажиллаж байна. Үерийн ус орсон 25 байршилд ус соруулж байгаа. Мөн болзошгүй эрсдэлээс сэргийлэн 27 мянган хэрэглэгчийн цахилгааныг түр хязгаарласан. Ус соруулах ажил дуусвал эдгээр хэрэглэгчийг цахилгаанд холбоно. Дүүрэг бүр ижил зохион байгуулалттай ажиллаж байгаа бөгөөд хохирлын үнэлгээ тогтоох, яаралтай хариу арга хэмжээ авч, эрсдэлийг арилгах үүрэг чиглэл өгсөн. Эвдэрсэн авто замуудыг яаралтай цэвэрлэн, хөдөлгөөний аюулгүй байдлыг хангаж, бороо татарсны дараа нөхөн сэргээх, хучих ажлыг хийнэ гэлээ.

НОК: 38 байршилд ус соруулж байна, шөнийн 00:00 цагаас үргэлжлэн бороо орно

НЭМЭЛТ:

Нийслэлийн онцгой комисс хуралдлаа. Хуралд нийслэлийн харьяа 29 байгууллагын удирдлагууд оролцож, бороо орсны улмаас үүссэн нөхцөл байдал болон авч хэрэгжүүлж байгаа арга хэмжээнүүдийн талаарх мэдээллийг өгсөн юм.

Нийслэлийн Онцгой байдлын газрын дарга А.ДАШНЯМ:

-Улаанбаатар хотод орсон борооны улмаас 169 дуудлага мэдээлэл бүртгэгдсэн. Онцгой байдлын алба хаагчид холбогдох албаныхны хамт 38 байршилд ус соруулж байна. Мөн 10 байршилд цахилгаан тасалсан. Хүний амь эрсэдсэн тохиолдол гараагүй. Ус, цаг уур, орчны шинжилгээний газраас шиврээ бороо цаг хэртэй үргэлжилж, 00:00 цагаас хойш 2 цаг орчим бороо орно гэсэн мэдээлэл өгсөн. Тэрэлж, Налайх хоорондын зам усанд автаж, дүүргийн онцгой комисс ажиллаж байгаа. СӨХ-дод үерийн нөхцөл байдлаас сэргийлж, шуудайтай шороо бэлтгэх чиглэл өгсөн хэмээн танилцууллаа.

Хан-Уул дүүргийн хэмжээнд 15 дуудлага ирснээс гурван байршлын усыг соруулж дууссан байна.

Долоодугаар сарын 23-ны өдрийн 20:00 цагийн байдлаар Улаанбаатар хот орчмын голуудын усны түвшин 08:00 цагийн ажиглалтын мэдээтэй харьцуулахад Сэлбэ гол Дамбадаржаа, Санзай, Тэрэлж гол Тэрэлж амралт орчимд тус тус гурван см, Туул гол Улаанбаатар хот орчимд 27 см нэмэгдэж, үерийн түвшинд хүрэн үерлэж байна. Голуудын усны түвшинг байнга хянаж байгаа бөгөөд дөрвөн байршилд жижүүр гаргажээ. Ус ихтэй гудамжны гэрэлтүүлэг болон нурсан замын шонгуудын цахилгааныг тасалсан байна.

Нийслэлийн Засаг дарга бөгөөд Улаанбаатар хотын захирагч, Нийслэлийн онцгой комиссын дарга Д.Сумъяабазар иргэдийн аюулгүй байдлыг хангаж, нөхцөл байдлын мэдээллийг тухай бүр өгч, шуурхай арга хэмжээ авч ажиллахыг үүрэг болголоо.

НОК: 14132 хэрэглэгчийн эрчим хүчийг таслав

НЭМЭЛТ:

Холбогдох албаныхны өгч буй мэдээллээр одоогоор Баянзүрх дүүргийн 43-р хорооны 27 дэд өртөө 9647 хэрэглэгч, Сүхбаатар дүүргийн 1-р хорооны 17 дэд өртөө, 1447 хэрэглэгч, Хан-Уул 17,18-р хорооны 10 дэд өртөө, 3038 хэрэглэгчийг нийт 54 дэд өртөө 14132 хэрэглэгчийг болзошгүй эрсдэлээс сэргийлж, хүчдэлээс тасалсан байна.

Ус орж байгаа гэсэн байрууд болон дэд өртөөнд үзлэг хийн үргэлжлүүлэн ажиллаж байна.

Нийслэлийн Онцгой комисс хуралдаж байна

Нийслэлийн Онцгой комисс энэ цаг мөчид хуралдаж байна. Уг хуралд нийслэлийн 29 байгууллагын удирдлагууд оролцож, борооны дараах нөхцөл байдал болон хийж, хэрэгжүүлж байгаа ажлуудын талаарх мэдээллийг өгч буй аж.

Улаанбаатар хотод өнөөдөр бороо орсны улмаас Нийслэлийн Онцгой байдлын газарт 20:30 цагийн байдлаар гэр, байшин, хашаа, орон сууцны хорооллын В1 давхар усанд автсан 220 гаруй дуудлага мэдээлэл бүртгэгджээ.

Улаанбаатар цахилгаан түгээх станц иргэдийн аюулгүй байдлыг хангах зорилгоор зарим дүүрэг дэх орон сууцнуудын эрчим хүчийг таслаад байгаа юм.

Улаанбаатар хот орчимд өнөөдөр 25-86мм бороо орсоноос, хамгийн их нь Мишээл экспо орчимд оржээ.

Шөнөдөө Хэнтий нуруу орчимд бороо үргэлжлэн орохоор байна. Харин маргааш өдөртөө Улаанбаатар хотод бороо дахин орох урьдчилсан төлөв гарчээ.

Өнөөдөр 20:00 цагийн байдлаар Улаанбаатар хот орчмын голуудын усны түвшин 08:00 цагийн ажиглалтын мэдээтэй харьцуулахад усны түвшин Сэлбэ гол Дамбадаржаа, Санзай, Тэрэлж гол Тэрэлж амралт орчимд тус тус 3см, Туул гол Улаанбаатар хот орчимд 27 см нэмэгдэж үерийн түвшинд хүрэн үерлэж байна.