3041 хэрэглэгчийн цахилгаан эрчим хүчийг сэргээв

НЭМЭЛТ:

Улаанбаатар хотод орсон борооны улмаас 22:00 цагийн байдлаар Баянгол дүүрэгт 38, Баянзүрхэд 64, Сүхбаатарт 26, Хан-Уулд 106, Чингэлтэйд 18, Налайхад 4, Сонгинохайрхан дүүрэгт 5, нийт нийслэлийн хэмжээнд 254 дуудлага мэдээлэл бүртгэгдээд байна.

Нийт 25 байршилд ус соруулж байгаа бөгөөд 10 байршлын усыг соруулж дууссан.

Улаанбаатар цахилгаан түгээх сүлжээний 54 дэд өртөөнд холбогдсон 14,132 хэрэглэгчийн цахилгааныг болзошгүй эрсдэлээс сэргийлж тасалсан. 13 дэд өртөө, 3041 хэрэглэгчийн цахилгаан эрчим хүчийг сэргээгээд буй.

Нийслэлийн хэмжээнд нийт 157 алба хаагч 17 техник хэрэгсэл, 19 мотопомптой үүрэг гүйцэтгэж байна.

Гэр, байшин, орон сууц усанд автсан 80 гаруй дуудлага ирж, АЛБАНЫХАН дайчлагдав

НЭМЭЛТ:

Улаанбаатар хотод орсон борооны улмаас Нийслэлийн Онцгой байдлын газарт гэр, байшин, орон сууцны хорооллын В1 давхар усанд автсан гэх 80 гаруй дуудлага мэдээлэл иржээ.

Дуудлага мэдээллийн дагуу алба хаагчид иргэдийн аюулгүй байдлыг ханган ажиллаж байна гэж нийслэлийн Засаг даргын орлогч Ж.Сандагсүрэн мэдэгдлээ.

Натур төв, Сүхбаатар дүүргийн I хорооны хотхонуудын эрчим хүчийг таслав

НЭМЭЛТ:

Нийслэлийн Баянзүрх дүүргийн 43 дугаар хороо Натур төв, Сүхбаатар дүүргийн 1 дүгээр хорооны орон сууцны хотхонуудын хонгилын давхрууд усанд автах аюултай байгаа тул болзошгүй эрсдэлээс сэргийлэн хүчдэлээс таслаад байна гэж Улаанбаатар цахилгаан түгээх сүлжээ ТӨХК-иас мэдээллээ.

Улаанбаатар хотод өнөөдөр усархаг бороо орсны улмаас орон сууцны подволь, автомашины граж усанд автсан дуудлага Нийслэлийн Онцгой байдлын газарт ирээд байсан юм. Бороо орж байх үед 16 дуудлага ирсэн бол бороо зогссоноос хойш дуудлага нэмэгдсээр 40 гаруй болжээ.

Авто замууд усанд автсанаас зарим нь хууларч унасан бол Яармагийн замаар битүү ус туучих болж буй юм.

Улаанбаатар цахилгаан түгээх сүлжээ ТӨХК-иас дарааах сэрэмжлүүлгийг гаргаад байна.

Таны ойр орчимд ил гарсан цахилгааны утас, унаж болзошгүй шон тулгуур байвал өөрийн болон бусдын аюулгүй байдлыг хангаж, УБЦТС ТӨХК-ийн 24 цагийн үйл ажиллагаатай 7004-7004 дугаар болон https://www.facebook.com/ubedn хуудаст цаг алдалгүй мэдээлэхийг зөвлөлөө.

Улаанбаатарт орсон борооны улмаас нийтийн байрны подволиуд усанд автжээ

Улаанбаатар хотод өнөөдөр 15:00 цагийн орчимд усархаг бороо 20 минут орчим орж, эрчим нь саарсан ч 15:35 цагийн орчмоос буцаж ширүүссэнээр үер бууж болзошгүй байна.

Одоогоор Нийслэлийн Онцгой байдлын газарт бороо орсноос хойш 16 дуудлага ирээд буй аж. Ихэнх дуудлага Баянзүрх, Хан-Уул дүүргээс ирсэн бөгөөд “Байрны подволь усанд автсан. Байрны граж усанд автсан” гэх дуудлага зонхилж байна гэлээ. Нийслэлийн Онцгой байдлын аврагчид дуудлага өгсөн газруудад одоо ажиллаж буй аж.

Улаанбаатар хотын төв хэсгийн авто зам нэлэнхүйдээ усанд автсан байдалтай байна. Борооны ус зайлуулах шугам хангалттай бус, байгаа шугамынх нь 80 хувь шахам ашиглалтын шаардлага хангахгүй болсноос хотын төв хэсэг бороо орох бүрийд усанд автах болсон.

Гэр хороололд ч амаргүй байдаг ч одоогоор Нийслэлийн Онцгой байдлын газарт энэ чиглэлийн дуудлага ирээгүй байна. Гэхдээ өнөөдөр 10:52 цагт "Баянзүрх дүүргийн 23-р хороо Улиастайн гүүрний дээд талд голд автомашин суусан" гэх дуудлага ирсэн. Дуудлагын дагуу Аврах ангийн бүрэлдэхүүн автомашиныг татан гаргаж, хөгжлийн бэрхшээлтэй иргэн, бага насны хүүхэд зорчиж байсныг аюулгүй байдлыг ханган ажиллажээ.

Цаг уур орчны шинжилгээний газраас өнөө, маргаашдаа төвийн аймгуудын ихэнх нутгаар усархаг аадар бороо орох тул болзошгүй нөөлөг салхи, мөндөр, аянга цахилгаан, үер усны аюулаас сэрэмжтэй байхыг анхааруулж байна.