Сүүлийн гурван долоо хоногийн турш Энэтхэгийн хойд хэсгээр үргэлжилсэн их хэмжээний бороо орсноос Таж Махалын дэргэдүүр урсдаг Ямуна мөрний усны түвшин нэмэгдэж үерлэжээ. Үерийн ус Таж Махалын гадна талын хананд хүрч, зэргэлдээх цэцэрлэгийг хэдийнэ живүүлээд байгаа аж.

17-р зууны үед баригдсан түүхийн дурсгалт  Таж Махал  нь Агра хотод байдаг бөгөөд  Энэтхэгийн хойд нутгийн зарим хэсэгт үерийн улмаас наад зах нь 100 хүн амиа алдаж, байшин барилга, гүүрийг урсгаж, хөрсний гулгалт нүүрлэсэн байна.

Мөрний усны түвшин нэмэгдсээр байгаа ч Таж Махалыг үзэх жуулчдын хөл хөдөлгөөн их байгаа гэнэ. Түүнчлэн мөрний ус эргээ хальснаар Таж Махалын ойролцоох зарим намхан байшингуудыг үерт автуулж, оршин суугчдыг аюулгүй газар нүүлгэхийг шаардаж байна. Мөрний усны түвшин сүүлд 2010 онд Таж Махалын тусгаарлах хананд хүрч байжээ. Өмнө нь 1978 онд үерийн ус Таж Махалын суурийг бүрхэж байсан ч ийм үзэгдэл дахин гарахгүй гэж албаныхан мэдэгдэж байна.

Хайрын хөшөө гэгддэг алдарт Таж Махалыг Моголын эзэн хаан Шах Жахан өөрийн хайртай эхнэр Мумтазын дурсгалд зориулан Ямуна голын өмнөд эрэгт барьжээ. Тус цогцолборт тэдний булш, сүм хийд болон бусад Моголын хааны гэр бүлийн хэд хэдэн булш байдаг.

Алдартай энэ хөшөө нь Энэтхэгийн бэлгэ тэмдгийн нэг болсон бөгөөд жил бүр сая сая жуулчдыг татдаг.