Улсын наадам түрүүлж, шөвгөрсөн бөхчүүд баярын сэтгэгдлээ хуваалцаж байна. 

Монгол Улсын арслан М.БАДАРЧ:

-Энэ жил "Алтан цом"-оос эхлээд багаараа бид сайхан барилдлаа. Улсын наадам ес даван түрүүлсэндээ баяртай байна. Төрүүлж өсгөсөн ижий, аав, хань ижил, үр хүүхэд, дэмжиж уухайлсан нийт ард түмэндээ баярлалаа.

Санаснаараа сайхан барилдаж чадлаа. Энэ жил Архангай аймгийн минь 100 жилийн ой тохиож байгаа. Нутгийн зон олондоо бэлэг барьж чадлаа.

Сэтгэл маш өндөр байна. Хүлээлт өндөр дэмжиж байсан нийт наадамчиддаа баярлалаа.

ЭНЭ БОЛ "ИХ МОНГОЛ ХҮЧТЭН" ДЭВЖЭЭНИЙ БӨХЧҮҮДИЙН ЭХЛЭЛ БАЙХ БОЛНО

Өвөрхангай аймгийн харьяат Монгол Улсын гарьд Ц.БЯМБА-ОТГОН:

-Сайхан наадам боллоо. Өвөрхангайчууд, "Их Монгол" хүчтэн дэвжээнийхэн их сайхан наадлаа.

Төрийн наадамд үзүүр түрүүнд үлдсэндээ их баяртай байна.

Энэ бол "Их Монгол хүчтэн" дэвжээний бөхчүүдийн эхлэл байх болно.