"Барууныхан Москваг ялж, давамгайлах гэсэн төлөвлөгөөгөө орхихоос нааш Украин дахь зэвсэгт мөргөлдөөн зогсохгүй" гэж ОХУ-ын гадаад хэргийн сайд Сергей Лавров мэдэгдлээ. Тэрбээр Индонезийн сонинд өгсөн ярилцлагадаа, АНУ-ын тэргүүлсэн барууны холбоотнуудын зорилгыг дэлхийн ноёрхлоо бэхжүүлэх явдал гэж тодорхойлжээ. Лавров энэ долоо хоногт Жакарта хотод болох Зүүн Өмнөд Азийн холбооны гадаад хэргийн сайд нарын уулзалтад оролцохоор Индонезид ирсэн аж. 

"Украин дахь зэвсэгт мөргөлдөөн яагаад дуусахгүй байна? Хариулт нь маш энгийн. Барууныхан ноёрхлоо хадгалах төлөвлөгөөнөөсөө татгалзаж, Киевийн утсан хүүхэлдэйгээр дамжуулан Оросыг стратегийн ялагдалд оруулах гэсэн улайрсан хүслээ орхих хүртэл үргэлжилнэ. Одоохондоо энэ байр суурь өөрчлөгдөх шинжгүй байна" гэж Лавров ярьжээ. 

ОХУ нь өнгөрсөн 2022 оны хоёрдугаар сард "цэргийн тусгай ажиллагаа" нэрийн дор хөрш Украинд бүрэн хэмжээний дайн эхлүүлсэн. Дайн 17 дахь сардаа үргэлжилж, барууны холбоотнуудын тусламжтайгаар Украин нь сөрөг довтолгоо хийж байна. Украины ерөнхийлөгч Зеленскийг НАТО-гийн чуулганд оролцохоор Латви руу нисэхээс хэдхэн цагийн өмнө ОХУ-аас камиказе дроноор Киевт хоёр дахь өдрөө цохилт өгчээ.

ЭХ СУРВАЛЖ: REUTERS