Сэлбэ голын зүүн тал, Баянзүрх дүүрэгт 61 блок барилгын B1 давхар 101, 313 шоо метр буюу 101.3 тонн усанд автаж, дүүрсэн байсан. Үүнийг алба хаагчид шуурхай ажиллаж соруулж байгааг Нийслэлийн захирагчийн албанаас мэдээллээ.

Долдугаар сарын 8-ны 22:00 цагийн байдлаар үүнээс 11 блок барилгын 23.8 тонн усыг бүрэн соруулж дууссан байна.

Одоогийн байдлаар нийт 50 барилгын 77.5 тонн усны 60 хувь буюу 46.5 тонн усыг соруулжээ.

Өнөөдөр Буянгийн зам, Сэлбэ гол орчмын цэвэрлэгээ бүрэн дуусч, 800 гаруй тонн лаг, шаврыг ачиж тээвэрлэсэн байна. Харин хотын хэмжээнд нийт 1100 гаруй тонн лаг, шаврыг цэвэрлэжээ.

ГОЛУУДЫН УСНЫ ТҮВШИН БУУРЧ БАЙНА

Туул голын усны түвшин болж 263 см болж буурсан байна. Тодруулбал, туул голын усны түвшин 1966 оны үерийн түвшинд буюу 311 см-т хүрээд байсан. Тэгвэл 7-ны 20:00 цагийн байдлаар 263 см болж буурсан байна. Усны түвшнээс харвал:

• 02:00 цагт 301 см
• 04:00 цагт 308 см
• 06:00 цагт 311 см буюу үерийн аюултай түвшинг 51 см давсан бол
• 08:00 цагт 308 см
• 18:00 цагт 270 см
• 20:00 цагийн байдлаар 263 см болж буурчээ.

Хэдий тийм боловч усны түвшин нэмэгдэж болзошгүй тул Туул голын орчим амьдарч байгаа иргэдийг анхаарал, сэрэмжтэй байхыг анхааруулж байна.