Орос-Хятадын газрын тосны хоолой Амур мужийн Сковородино хотоос Хятадын хойд талын Хейлонгжианг мужийн Дачинг хот хүртэл үргэлжилж байгаа юм. Уг хоолойны Оросын талын нээлтэд ОХУ-ын Ерөнхий сайд Владимир Путин оролцох гэж байна гэж Оросын “РИА Новости” агентлаг мэдээллээ. Зүүн Сибирь-Номхон далайг холбосон газрын тосны төслийн нэг хэсэг болох уг хоолойг барих ажлыг 2009 оны арванхоёрдугаар сард эхлүүлсэн бөгөөд Сибириэс Алс Дорнод, Хятад, Номхон далайн муж руу өдөрт 1.6 сая баррель (220,000) тонн газрын тос шахах хүчин чадалтай ажээ.

Энэ оны гуравдугаар сард Хятадын Гадаад хэргийн яамны сайд Яанг Жиечи тус хоолойг энэ оны сүүлээр гэхэд баригдаж дуусах ба 2011 он гэхэд бүрэн хүчин чадлаараа ажиллаж эхлэх болно гэж ярьж байсан юм. Оросын газрын тосны хамгийн том компани болох “Роснефть”, газрын тосны хоолойн монополь “Транснефть” болон Хятадын төрийн өмчийн “China National Petroleum Corporation” (CNPC) нар хамтран энэ төслийг хэрэгжүүлж байгаа ажээ. Гэрээний дагуу Хятадын тал Оросын компаниудад газрын тос дамжуулах хоолой барихад нь зориулж 25 тэрбум ам.доллар зээлүүлсэн байна. Үүний хариуд Оросын тал 2011-2030 он хүртэлх хугацаанд жил тутам 15 сая тонн газрын тос шахах гэрээ байгуулахыг зөвшөөрсөн хэмээн “РИА Новости” агентлаг дамжуулж байна.

Т.БАДРАХ