НҮБ-ын Аюулгүйн зөвлөл өчигдөр санал нэгтэйгээр Мали дахь энхийг сахиулах үүргээ нэн даруй зогсоохоор шийджээ.  Мали улсын цэргийн хунта исламын босогчидтой тэмцэхэд туслахаар Оросын Вагнер группээс хөлсний цэргүүдийг авчирсан байна.

Баруун Африкийн далайд гарцгүй Мали улс арав гаруй жил босогчидтой тэмцэж байна. Эрх баригч хунта Вагнерын хөлсний цэргүүдийг авчирсанаас болж олон улсын хамтын нийгэмлэгтэй харилцах харилцаа нь зарим талаар хурцадсан.

Францын боловсруулсан тогтоолын төслийг 15-0-ийн саналаар баталсан ба “MINUSMA” гэгддэг энхийг сахиулах ажиллагааны бүрэн эрхийг Баасан гаригаас эхлэн дуусгавар болгож байна. Мали улсаас өнөөдөр 15,000 гаруй албан хаагчийг эргүүлэн татах ажлыг эхлүүлж, оны эцэс гэхэд дуусгахыг номлолд тушаажээ.

Үүний зэрэгцээ АНУ-ын Үндэсний аюулгүй байдлын зөвлөлийн хэвлэлийн төлөөлөгч Жон Кирби мэдэгдэлдээ, Вагнер групп компанийн Африк, ялангуяа Мали, Төв Африкийн Бүгд Найрамдах Улс дахь үйл ажиллагаанд гүнээ түгшиж байгаагаа илэрхийлэв.

Тэрээр Вашингтонд сэтгүүлчдэд хэлэхдээ, АНУ-ын мэдээлэл нь "Малигийн шилжилтийн засгийн газар 2021 оны сүүлээс хойш Вагнерт 200 сая гаруй доллар төлсөн" болохыг харуулж байна. Төлбөрийг үл харгалзан аюулгүй байдал сайжрахгүй байгаа бөгөөд Малигийн төвд террорист халдлага, хүчирхийллийн гэмт хэрэг нэмэгджээ.

Мали улс 2012 оноос хойш исламын хэт даврагч босогчдыг дарах гэж тэмцсээр ирсэн. Хэт даврагч босогчид Франц тэргүүтэй цэргийн ажиллагааны тусламжтайгаар дараа жил нь Баруун Африкийн тус улсын хойд хотуудад засгийн эрхээс хөөгдсөн. Гэвч тэд элсэн цөлд дахин цугларч, Малигийн арми болон түүний холбоотнууд руу довтолж эхлэв. НҮБ-ын энхийг сахиулагчид хэдхэн сарын дараа ирсэн. НҮБ-ын Ерөнхий нарийн бичгийн дарга Антонио Гутерреш "Мали улсад 10 жилийн хугацаанд энх тайвны төлөөх үйлсэд 309 албан хаагч амь үрэгдсэн" гэж мэдэгдсэн. 

ЭХ СУРВАЛЖ: ASSOCIATED PRESS