Давсны ширхэгээс ч жижиг хэмжээтэй гар цүнхийг "MSCHF" брэнд урлажээ. 657 x 222 x 700 микрометр хэмжээтэй энэ цүнхийг харахын тулд микроскоп ашиглана. Тэгвэл энэхүү сонирхолтой цүнхийг 63,750 ам.доллараар дуудлагаар худалджээ. Дуудлага худалдааны үнийн санал 15 мянган ам.доллараас эхэлсэн. 

"MSCHF" брэнд нь янз бүрийн маргаантай загваруудаараа алдартай. Тухайлбал, сүүлийн үед трэнд болсон том улаан резинэн гутлыг тус брэнд үйлдвэрлэсэн. Энэ удаад тэд цүнхний чиг хандлагыг туйлд нь хүргэхээр шийджээ. Цүнхний дээр "Louis Vuitton" логог бичсэн боловч энэ нь тус брэндтэй ямар ч холбоогүй бөгөөд зөвшөөрөл ч аваагүй аж.

Цүнхийг фотополимер давирхайгаар хийсэн бөгөөд жижиг загвар, бүтэц хийхэд ашигладаг 3D хэвлэх технологийг ашиглан бүтээсэн. Хэт жижиг хэмжээтэй учир бүтээх явцад зарим дээж нь алга болжээ. "Том, жижиг, хэвийн янз бүрийн хэмжээтэй цүнхнүүд байдаг. Харин энэ цүнх бол хамгийн жижиг цүнхний эцсийн хувилбар юм" гэж брэндийн зүгээс мэдэгдлээ. 

Эх сурвалж: BBC