“Монголын газрын тос боловсруулах үйлдвэр” ТӨХК-ийн захирал Д.Алтанцэцэгийг чөлөөлөхийг шаардаж, үндэсний компаниуд өнөөдөр /2023.06.23/ “Зууны мэдээ” сонины мэдээллийн төвд хэвлэлийн бага хурал хийлээ.

Тэд “Монгол Улсын Засгийн газрын 2019 оны 129 дүгээр тогтоолын хэрэгжилтийг хангах ажлын хүрээнд Дорноговь аймгийн Алтанширээт суманд Монголын газрын тос боловсруулах үйлдвэрийн бүтээн байгуулалтын ажил үргэлжилж байгаа.

Гэхдээ энэ хүрээнд баригдах ёстой байсан ажилчдын орон сууцны 2-р ээлжийн 287 айлын орон сууцны хотхоны барилга угсралтын ажил гацсан. Уг барилга ашиглалтад орсноор гадаадаас ирж байгаа нарийн мэргэжлийн инженер техникийн мэргэжилтнүүд,  Монголын залуус, залуу гэр гэр бүл байрлаж, ажил үүргээ хэвийн үргэлжлүүлэх боломж нөхцөлөөр хангах ёстой юм. Харамсалтай нь, төсөл хэрэгжүүлэгч, “Монголын газрын тос боловсруулах үйлдвэр” ТӨХХК-ийн захирлаас болоод аж ахуй нэгж байгууллагууд нь санхүүжилтээ авч чадахгүй, хохирсноос энэ төсөл гацаад байна. Засгийн газрын бүтээн байгуулалт цаг хугацаатай уралдаж хийгддэг.

Бүтээн байгуулалт зогссон шалтгаан нь “Монголын газрын тос боловсруулах үйлдвэр” ТӨХХК-ийн захирал Д.Алтанцэцэгтэй холбоотой. Тэрбээр улсын эрх ашгийг хувийн эрх ашгийнхаа дараа тавьж, бүх талаар уг ажлыг гацааж, үйлдвэрийг ашиглалтад оруулахгүй байх хүсэл сонирхолтой байж, төрийн бүх албан тушаалтнуудыг худал мэдээллээр хангаж байгаа тул хариуцлага тооцох.

287 айлын орон сууцны барилга угсралтын ажлын гэрээнд мэргэжлийн байгууллагуудын гаргасан дүгнэлтэд заасны дагуу үнийн тохируулга хийж, зөрүүтэй асуудлыг залруулан, барилга угсралтын ажлыг үргэжлүүлэн яаралтай ашиглалтад оруулах асуудлыг шийдвэрлэх шаардлага байна.

Нэг давхартаа 26 баганатай байх барилгыг “12 баганатай байхаар хий” гэж үндэслэлгүй тайлбар хийж муйхарлаж байна.

Монгол Улс дотооддоо нефтийн бүтээгдэхүүнээ үйлдвэрлэх нь бусдаас хараат бус болох ач холбогдолтой. Тийм учраас үндэсний компаниуд энэ ажлыг урагшлуулахын тулд Covid-19 цар тахалтай нүүр тулж, хил гааль хаагдаж, барилгын материалын үнэ өсч, хүнд нөхцөл тулгарсан ч ажлаа зогсоохгүй үргэлжлүүлсээр ирсэн. Гэтэл нэг хүний эрх ашиг эрх мэдлээс болж, энэ ажил зогссон.

Иймээс аудитын дүгнэлтээр Шилэн дансаа хөтөлдөггүй “Монголын газрын тос боловсруулах үйлдвэр” ТӨХХК-ийн захирал Д.Алтанцэцэгийг Засгийн газрын “Шүүр” ажиллагаанд оруулж, чөлөөлөх шаардлага байна” гэж мэдэгдлээ.

Шаардлагаа Засгийн газрын хэрэг эрхлэх газрын дарга Д.Амарбаясгалан, Шадар сайд С.Амарсайхан нарт хүргүүлэх аж.

Г.ХОРОЛ