Улсын наадамд тунаж заан цол хүртсэн бөх “жимни” автомашины эзэн болохыг Монголын бөхийн холбооноос мэдээллээ. Тодруулбал, энэ жил улсын наадамд долоо давж шинээр заан цол авсан бөхчүүдэд тус машиныг бэлэглэх аж.

МҮБХ-ноос гаргасан мэдэгдэлд, “Монгол Улсын хувийн хэвшлийн ууган компаниудын нэг Бридж корпораци “Аливаа улс үндэстэн үндэснийхээ соёл, ахуй, уламжлал, ёс заншилдаа үндэслэн хөгжих нь хамгийн зөв” гэсэн үзэл баримтлалыг эрхэмлэдэг. Ийм учраас тус корпораци нь байгуулагдсан үеэсээ эхлэн Үндэсний бөхийн спортыг бодитой дэмжиж ирсэн байдаг. Тухайлбал, Бөхийн өргөөг анх барихад томоохон санхүүгийн дэмжлэг үзүүлснээс гадна “Баянзүрх хайрханы хишиг” барилдааныг нийт 14 жил ивээн тэтгэж хамтран зохион байгуулалцсаар ирсэн түүхтэй. Түүнчлэн тус корпораци нь сүүлийн хоёр жил дараалан Үндэсний их баяр наадмын хүчит бөхийн барилдааны долоогийн уран мэхийг уралдуулан, хурд хүч, бяраа гайхуулан барилдаж, даван шинээр улсын заан цол хүртсэн бөхөд “ЗААН ЖИМНИ” автомашиныг бай шагнал болгон өгдөг уламжлалыг тогтоосон бөгөөд өмнөх жилүүдэд улсын гарди М.Бадарч, улсын заан М.Лхагвагэрэл нар энэхүү “ЗААН ЖИМНИ” автомашины эзэн болж байсан билээ.

Ийнхүү Бридж корпораци болон Монголын Үндэсний Бөхийн Холбоотой хамтран энэхүү үйл ажиллагааны санамж бичгийг 2023 оны энэ сарын 20-ны өдөр Сузуки автомашины үзэсгэлэнгийн танхимд байгууллаа.

Тус санамж бичигт Бридж корпорацийн гүйцэтгэх захирал Ө.Батзориг, МҮБХ-ны тэргүүн, улсын заан Ц.Магалжав нар гарын үсэг зуран баталгаажуулсан юм.

Энэ жил улсын наадмаар хаанахын хэний хүү долоогийн даваанд тунан барилдаж даван “Заан Жимни”-гийн эзэн болох бол оо? гэж үндэсний бөхөө шимтэн үзэгч Монгол түмэн маань таамаг дэвшүүлэн хүлээж суугаа нь гарцаагүй” гэжээ.