Үндэсний их баяр наадам үзэж, сонирхох гадаад, дотоодын иргэдийн дунд тасалбар эрэлт ихтэй байдаг. Хэдийгээр энэ жилийн тасалбар худалдаанд хараахан гараагүй байгаа ч хүмүүс аль хэдийнэ сураглаад эхэлжээ. Тиймээс энэ талаар Аялал жуулчлалын холбооноос тодрууллаа.

Монгол аялал жуулчлалын холбооноос өгсөн мэдээллээр "Үндэсний их баяр наадмын суудал хуваарилалтын асуудлаар МУ-ын шадар сайдад МАЖХолбоо албан хүсэлт хүргүүлсэн. Хариу нь хараахан ирээгүй байна.

Шадар сайдын дэргэдэх ажлын хэсэгтэй холбогдож тасалбарын талаарх мэдээллийг авсан. Энэ жил зочлох жилийн хүрээнд Монгол Улсад үндэсний их баяр наадмаар олон улсын зочид төлөөлөгч, гадаадын хөрөнгө оруулагчдын уулзалт зэрэг олон арга хэмжээ давхцаж байгаатай холбогдуулан зохицуулалт хийх шаардлагатай байгаа тул хараахан эцсийн шийдвэр гараагүй байна.

Энэ долоо хоногт шийдвэр  гарна” гэсэн хариуг өглөө.

НААДМЫН ТАСАЛБАРЫГ ЦАХИМААР ХУДАЛДАНА

Өнгөрсөн жилийн баяр наадмын тасалбарыг цахимаар худалдаалсан бөгөөд тасалбар борлуулалтын  захиалга цагийн дотор 100 хувь дүүрч байв. Улмаар шагийн үнэ тэнгэрт хадаж байсан. Энэ жил ч мөн энэ асуудал үүсч магадгүй гэдгийг иргэд цахим хуудастаа бичиж байна. Тиймээс  иргэдийн дунд эрэлт их үүсч, шагийн тасалбарын худалдаа цахим орчинд мөн ихэсч болзошгүй. 2022 оны тухайд сүүдрэвчтэй, сүүдрэвчгүй, олноор авах, хүргүүлэх зэргээс шалтгаалж тасалбарын үнэ харилцан адилгүй байсан.

Тухайлбал, сүүдрэвчтэй хос тасалбар өнгөрсөн наадмаар хүргэлтгүй очиж авах бол хамгийн хямд нь 250-300 мянган төгрөгт хүрсэн юм.