Говийн аймгууд болох Өмнөговь, Дундговь аймагт АИ92 төрлийн шатахууны хомсдол үүсч, жуулчин тээврийн үйл ажиллагаанд хүндрэл үүссэн хэвээр байгааг Монголын аялал жуулчлалын холбооноос мэдээллээ. МАЖХ-ноос “Монголын газрын тос импортлогчдын мэргэжлийн холбоо”-нд хандан энэхүү асуудлыг тавьсан боловч энэ асуудлаар ямар нэгэн арга хэмжээ авч шийдвэрлэх боломжгүй, салбарын яамаараа дамжуулан “Уул уурхай, хүнд үйлдвэрлэлийн яам”-руу хандаж асуудлаа тавихыг санал болгосон байна. Тиймээс аялал жуулчлалын холбооноос шатахууны тасалдалтай холбоотой үүсч байгаа нөхцөл байдлыг шийдвэрлэж өгөхийг салбар яамнаас хүсчээ.

Тодруулбал, БОАЖ-ын сайд Б.Бат-Эрдэнэ-д өнгөрсөн сарын 15-нд 38/23 тоот, “Петровис" ХХК-нд мөн тавдугаар сарын 23-нд 39/24 тоот албан хүсэлтийг тус тус явуулсан байна.

Өнөөдрийг хүртэл “Шатахуун нийлүүлэгчдийн тээвэрлэлтээс шалтгаалж тасалдаж байгаа” гэсэн хариултыг аваад байгаа ч энэ удаа Уул уурхай, хүнд үйлдвэрийн сайд Ж.Ганбаатар-т хандан хүсэлтээ хүргүүлжээ. Салбар нэгжүүд тасалдал үүсээгүй гэх хариултыг өгөөд байгаа юм. Тиймээс МАЖХ уг асуудлаар Ерөнхий сайдад мөн ханджээ.