Сонгинохайрхан дүүргийн Эмээлтийн замд өнгөрсөн Баасан гаригт /2023.06.19/ жуулчид тээвэрлэж явсан автобус осолдсон. Ослын талаарх дуудлага нийслэлийн Түргэн тусламжийн төвд ирсэн бөгөөд дөрвөн машинтай эмч ажилчид дуудлагын дагуу газар дээр нь очиж, биеийн байдал нь хүнд, хүндэвтэр хүмүүсийг Гэмтэл согог судлалын үндэсний төвд хүргэсэн билээ. Тодруулбал, Непал улсын 26 иргэнийг ГССҮТ-д яаралтай хүргэж, эмнэлгийн тусламж үзүүлсэн. Эдгээрээс хоёр хүний биеийн байдал хүнд байсан учир хэвтэн эмчлүүлж байгаа. Тэдгээр хүмүүсийн биеийн байдлыг тодрууллаа.

ГССҮТ-өөс өгсөн мэдээллээр "Гадаадын 26 иргэнээс дөрвөн иргэн хүнд болон хүндэвтэр зэргийн гэмтэлтэй байсан. Тэдгээр хүмүүсийн хоёр нь Эрчимт эмчилгээний тасаг, Хавсарсан гэмтлийн тасагт хэвтэн эмчлүүлж байна.

Хүндэвтэр оноштой хоёр хүн нь оношлогоо, шинжилгээ хийлгэсний дараа хэвтэн эмчлүүлэхээс татгалзсан. Хэвтэн эмчлүүлж байгаа хүмүүст шаардлагатай эмнэлгийн тусламжийг үзүүлж байгаа.

Эрчимт эмчилгээний тасаг, Хавсарсан гэмтлийн тасагт хэвтэн эмчлүүлж байгаа хүмүүсийн биеийн байдал нь хүнд хэвээр байна" гэлээ.