Энэ сарын 16, 17-ны өдрүүдэд буюу ирэх Баасан, Бямба гарагт Үндэсний соёл амралтын хүрээлэн буюу Хүүхдийн паркад "Mayor’s Ulaanbaatar Challenger” 3х3 сагсан бөмбөгийн Дэлхийн гранпри тэмцээн зохион байгуулагдана.

Тус тэмцээн нь Олон улсын сагсан бөмбөгийн холбооны Парис 2024 Олимпын эрхийн оноо олгох албан ёсны цуврал тэмцээнүүдийн нэг юм.
Энэ жилээс уламжлал болгон тус тэмцээнийг хотын аялал жуулчлалыг спортоор дамжуулан хөгжүүлэх үүднээс Улаанбаатар хотын засаг даргын тамгын газар дэмжин хамтран зохион байгуулж эхэллээ.

Тэмцээнд дэлхийн шилдгүүд болох Сербийн ҮБ, Бельгийн Антверп, Латвийн Рига, БНХАУ-ын Футион, АНУ-ын Харлем, Канадын Торонто, Польшийн Лүблин, Литвийн Мариянпол, Литвийн Каунас багууд дээр Монголын Улаанбаатар ММС Энержи, Сансар ММС Энержи, Амгалан, Баянгол Бронкос, Отгонтэнгэр Бродерс багууд нэмэгдэн өрсөлдөнө.

Гадны багуудаас онцлох багууд бол Дэлхийн 5 удаагийн аварга Дэян Маястрович, Дэлхийн аваргын Үнэ цэнэтэй тоглогч, Дэлхийн чансааны #1 тоглогч Страхина Стоячич нараар тэргүүлүүлсэн Дэлхийн #1 Сербийн ҮБ, Токио 2020 Олимпын наадын аварга Латвийн Рига багууд ирж байна.
Улаанбаатар ММС Энержи багт ФИБА 3х3 Их дуулгын аварга Серби улсын иргэн Марко Дугосия анхны тоглолтоо хийх бол тэдний бүрэлдэхүүнд Д. Дэлгэрням, Ц. Отгонжаргал, Стив Сөр нар багтаж байна. Сансар ММС Энержи багт А. Ананд, О. Энхбаатар, Г. Ихбаяр, Н. Мөнхчөдөр, Баянгол Бронкос багт Б. Билгүүн, Д. Мөнхтүвшин, О. Сэргэлэн, Б. Тулуй нар өрсөлдөх бол Амгалан, Отгонтэнгэр Бродерс багт Үндэсний дээд лигийн залуу шилдэг тоглогчид багтжээ.

"Mayor’s Ulaanbaatar Challenger 2023" тэмцээний аварга баг 15000 USD, дэд аварга 10 000 USD, 3-р байр 6000USD, 4-р байр 5000USD шагнал авах ба эхний 2 байранд орсон баг Швейцарь улсын Люзанн хотод болох Дэлхийн Их дуулгын эрхийг авна.
Монголын болоод дэлхийн шилдэг багуудын өрсөлдөөнийг эх орондоо үзэн боломжийг ашиглан энэ баасан, бямба гарагт Үндэсний соёл амралтын хүрээлэн буюу Хүүхдийн паркыг зориорой.