Татварын ерөнхий газрын мэдээллээр 2022 оны НӨАТ-ын буцаан олголтын урамшуулал болох нэг тэрбум төгрөг эзэддээ хараахан хүрээгүй байгаа аж.

Тодруулбал, Цахим төлбөрийн баримтын систем /ebarimt.mn/-ээс НӨАТ-ын буцаан олголтын урамшууллын гүйлгээг  Төрийн санд шилжүүлэхдээ "Монгол банкны Дансны нэгдсэн сан” дах  мэдээлэлтэй  тулган шалгадаг болсонтой холбоотойгоор давхардсан тоогоор 41 мянган  иргэний  2022 оны Нэмэгдсэн өртгийн албан татварын буцаан олголтын урамшуулал нэг тэрбум төгрөг олгогдоогүй байна.

Иймд буцаан олголтоо аваагүй байгаа иргэд 2023 оны зургадугаар сарын 30-ны өдрөөс өмнө дараах хоёр үйлдлийг амжиж хийгээрэй.

– Цахим төлбөрийн баримтын систем /ebarimt.mn/-д бүртгүүлсэн дансны мэдээллээ, өөрийн харилцагч банкнаас  "Монгол банкны Дансны нэгдсэн сан”-д хүргүүлсэн мэдээлэлтэй тулган шалгаж, зөрүүтэй тохиолдолд залруулах;

– Буцаан олголтын урамшуулал авах хүсэлтээ  EBARIMT системд 2023 оны зургадугаар сарын 30-ны өдрийн  дотор гаргаж, баталгаажуулах;

Дээрх хугацаанд мэдээллээ залруулж, урамшууллаа авах хүсэлтээ гаргаагүй бол таны 2022 оны НӨАТ-ын  урамшуулал цуцлагдаж, санхүүжилт нь улсын төсөвт буцаагдахыг анхааруулж байна.

Г.ХОРОЛ