Шатахууны хомсдол нүүрлэх эрсдэл байна

ОХУ-ын Ангарскийн газрын тос боловсруулах үйлдвэр жил бүрийн наймдугаар сард засвар үйлчилгээг 15 хоногийн хугацаанд хийдэг. Тэгвэл тус үйлдвэр энэ жил бүтэн сар засвар хийхээр болсон гэх мэдээлэл байна. Монгол Улс энэхүү үйлдвэрээс бензин шатахуунаа авдаг учраас бүтэн сарын зогсолтоос шалтгаалан бензиний хомсдолд орж болзошгүй гэх мэдээллийг салбарынхан сануулж байна.

Энэ талаар Уул уурхай, хүнд үйлдвэрийн сайд Ж.Ганбаатар өнөөдөр /2023.06.09/ УИХ-ын нэгдсэн чуулганы үеэр ярихдаа “АИ-92” болон дизель түлшний хангалт хэвийн байна. Жил бүр ОХУ-ын Ангарскийн үйлдвэр 14 хоног зогсч засвар хийдэг. Үүнээс улбаалаад зуны түлшнээс өвлийн түлшинд шилжихэд хомсдол үүсдэг. Үүнээс сэргийлэх арга хэмжээ авч байна. ОХУ-ын төмөр замын ачааллын асуудал тулгарч байна. Монголын талд тээвэрлэлтийн хувьд асуудал байгаа. Ялангуяа жил бүрийн наймдугаар сард түлш тасалдах асуудал байдаг" гэсэн юм. Салбарын сайдын үгнээс харахад шатахууны нийлүүлэлтэд хомсдол үүсэхгүй гэсэн баталгаа алга.

Хэдийгээр Ж.Ганбаатар сайд түлшний үнэ 200 төгрөгөөр буурсан тухай мэдээлэл чуулганы хуралдаанд өгсөн ч хэрэвзээ ОХУ-ын Ангарскийн газрын тос боловсруулах үйлдвэр бүтэн нэг сар засварт орвол хомсдлоос болж эргээд нийлүүлэлтийн үнэ нэмэгдэж магадгүй байна. Тэгвэд дотоодын жижиглэн борлуулалтын үнэд нөлөөлөх, импортлогчдод үнийн зөрүүтэй алдагдал үүсэх нь гарцаагүй. Тиймээс зарим уул уурхай, барилгын компаниуд түлш нөөцлөх болсноор импортлогчид жижиглэнгийн худалдаандаа хязгаарлалт тогтоох вий гэсэн болгоомжлол ч байна.