Оросын мисс шалгаруулах тэмцээний ялагчаар Хабаровкс мужаас ирсэн Наталья Оскар гэх эмэгтэй тодорчээ. Тус тэмцээн нь өнгөрсөн Мягмар гаригт болсон.

Гэвч ялагчийн зураг цахим сүлжээнд байршсанаар бүсгүй олны хэл амны бай болов. Хэт зузаан уруултай, хүнд нүүр будалттай, намхан, пластик мэс засал хийлгэсэн гэх мэтээр хүмүүс түүнийг шүүмжилжээ.

Ялагч бүсгүй ийнхүү цахим орчинд баалуулах болсон тул тэмцээнийг зохион байгуулагчид оролцогчоо өмөөрөхөөс өөр аргагүй болжээ. Тэд Наталья Оскарын зургийг дарахдаа өнцгийг нь олоогүй гэж зурагчинг буруутгасан байна.

"Мисс Орос" тэмцээний оролцогчид гэрлэсэн, хүүхэдтэй байх ёстой байдаг. Энэ жилээс тэмцээний шалгуур өөрчлөгдөж, өндөр нам, өргөн нарийн хамаарахгүй бүх эмэгтэй оролцох боломжтой болжээ. Өмнө нь оролцогчид заавал 175 см-ээс дээш өндөртэй, S юм уу XS размерын хувцас өмсдөг байх ёстой байсан. "Бид энэ шалгуураа цуцалж, эмэгтэйчүүдийг байгаагаар нь хүлээж авахаар шийдсэн. Эцсийн эцэст энэ бол загварын тэмцээн биш. Харин ч гэрлэсэн эмэгтэйчүүд, ээжүүдийн тэмцээн" гэж тэмцээний зохион байгуулагч Ирина Кирсанова ярьжээ.

Наталья Оскарын тэмцээний үеэрх зураг болон инстаграм дахь зургууд нь хоорондоо ялгаатай байгааг хүмүүс шүүмжилж байна. Зохион байгуулагч Ирина Кирсанова хэлэхдээ "Тэр манай албан ёсны зургууд дээр үнэхээр үзэсгэлэнтэй байсан. Хүмүүсийн хандлагыг би их гайхлаа. Буруу өнцөгөөс авсан муу зураг л байна шүү дээ. Наталья Оскар тэс өөр эмэгтэй. Шүүгчдийн бүрэлдэхүүн бүгд л түүнийг харсан, тэр бүгдэд нь таалагдсан" гэжээ.

Ялагч Наталья Оскар нь 34 настай бөгөөд нөхөр, нэг хүүхэд, нохойтойгоо амьдардаг, англи хэлний багш мэргэжилтэй. Тэрбээр хэвлэлд ярилцлага өгөхдөө цахим доромжлолыг тоохгүй байгаа гэжээ. Мөн гоо сайхны мэс засалд ороогүй гэв. "Би энэ тэмцээнд маш шаргуу бэлдсэн. Бүтэн өдөржингөө өндөр өсгийт өмсөж, хэдхэн цаг унтаж байсан" гэж тэр ярьжээ.

Эх сурвалж: THE TELEGRAPH