ОХУ-ын Ерөнхийлөгч Владимир Путин өөрийгөө Зөвлөлтийн элит тагнуулч байсан гэж олон нийтэд итгүүлдэг. Тэгвэл Путин хэзээ ч шилдэг тагнуулч байгаагүй гэх мэдээллийг Германы "Der Spiegel" мэдээллийн агентлаг судлан гаргаж иржээ. Путины 1980-аад оны үед тагнуулын ажилтан байсан тухай түүх янз бүр байдаг. Мөн тэрбээр өөрөө энэ үеийн талаар хэзээ ч тайлбар хийж байгаагүй тул энэ нь зарим талаараа нууцлагдмал үе юм. Гэвч олон түүх түүнийг КГБ-ын байрыг дээрэмчдээс ганцаараа хамгаалж, Улаан армийн фракцын гишүүдтэй уулзах зэрэг маш нууц даалгавруудыг гүйцэтгэсэн баатарлаг дүрээр дүрсэлсэн байдаг. Түүнчлэн Баруун Германд үймээн самуун дэгдээж, хэд хэдэн хүн хулгайлж, аллага үйлдсэн гэх мэт. 

Гэхдээ "Der Spiegel"-ийн мэдээлэлд дурдсанаар, Путины ихэнх ажил нь үнэндээ "уйтгартай, энгийн" захиргааны ажлуудаар хязгаарлагдаж байжээ. КГБ-ын Дрезден дэх оффист Путинтай хамт ажиллаж байсан хүмүүсийн нэг хэлэхдээ, "Түүний ажил нь баруун Герман дахь хамаатан садныдаа зочлох хүмүүсийн эцэс төгсгөлгүй хүсэлтийг хянан шалгах эсвэл Дрездений их сургуулийн гадаад оюутнуудын дунд боломжит мэдээллэгч хайх зэрэг байсан" гэжээ.

Зүүн Германы улсын аюулгүй байдлын алба болох Штазийн баримт бичгүүдэд Путиныг бараг дурддаггүй гэж мэдээлэлд дурджээ. Дрезден хотод ажиллаж байсан Штазийн офицер асан Хорст Жемлич хэлэхдээ, "Путин бол "цүнх баригч" л байсан" гэв. 

Путины мэдээлэлд ЗХУ-ын тагнуулын албад 20 орчим жил ажилласан бөгөөд 1985 онд Зүүн Германы Дрезден рүү нүүсэн гэдэг. Үүнээс дөрвөн жилийн дараа Берлин хотыг тусгаарласан хана нуран унаж, Хүйтэн дайн дуусч, Герман улс нэгдэх эхний том алхам болсон. Путин КГБ-аас дэд хурандаа цолтой халагдсан гэдэг. Харин КГБ-ын өндөр албан тушаалтан байсан Олег Калугин 2015 онд хэлэхдээ, "Путин худлаа хэлж, тэр зүгээр л хошууч байсан" гэж хэлсэн байдаг. 

ЭХ СУРВАЛЖ:  BUSINESS INSIDER