Ази тив дэх синтетик хар тамхины худалдаа туйлдаа хүрч байгааг Баасан гаригт гарсан НҮБ-ын шинэ тайланд дурдлаа. Гэмт хэргийн бүлэглэлүүд хууль хяналтынхнаас зайлсхийхийн тулд худалдааны шинэ замуудыг бий болгож, метамфетамины үнэ хамгийн доод түвшиндээ хүрчээ. НҮБ-ын Мансууруулах бодис, гэмт хэрэгтэй тэмцэх газрын судалгаанаас харвал Зүүн болон Зүүн өмнөд Азийн орнуудад хар тамхины худалдаа Covid-19-ийн өмнөх үетэйгээ ижил түвшинд буцсан байна. Цар тахлын улмаас хаалттай байсан хил гааль нээгдсэнээр олон улсын гэмт хэргийн байгууллагууд дахин холбогдох болжээ. 

Хар тамхины наймаа сэргэж буй олон шинж тэмдэг бий. Япон улс өнгөрсөн оны хоёрдугаар хагаст хилээ нээсний дараа агаарын тээврээр зорчигчид метамфетаминыг хууль бусаар нэвтрүүлэх нь ихэссэн гэдгийг гаалийн ажилтнууд нь хэлж байна. Түүнчлэн бөөний болон гудамжны худалдааны үнэ хамгийн доод түвшиндээ хүртэл буурсан нь хангамж тасалдалгүй байсаар байгаагийн шинж юм. Хар тамхитай холбоотой баривчилгаа, эмчилгээний төвүүдэд хэвтэн эмчлүүлэгсдийн тоо ч өсчээ. 

Мьянмар дахь улс төрийн тогтворгүй байдлыг ашиглан зохион байгуулалттай гэмт хэргийн бүлэглэлүүд хууль бус үйлдвэрлэл, наймааг хөгжүүлж байна. Эрх баригчид тус улсаас 27.4 тонн хүчтэй диссоциаци анестетикийг хураан авсан нь өмнөх оноос 167 хувиар өссөн үзүүлэлт аж.

Удаан хугацааны турш тээврийн төв байсан Камбож нь эмийн үйлдвэрлэлийн гол цэг болж эхэлжээ. Тус улсад хэд хэдэн томоохон хэмжээний лаборатори, агуулахыг илрүүлсэн байна. Эдгээрээс олдсон химийн бодис, тоног төхөөрөмжийг харвал дор хаяж 12 өөр улс, мужаас гаралтай эсвэл тэдгээрээр дамжин өнгөрдөг олон улсын сүлжээг илтгэж байна. Тухайлбал, Францад үйлдвэрлэсэн, сав баглаа боодол дээр Вьетнам гэж бичсэн химийн бодис Камбожийн лабораториос олджээ. Мөн Польш, Энэтхэг, Индонез, Өмнөд Солонгосоос гаралтай химийн бодисууд байсан. Камбожийн эрх баригчид 2020 онд ердөө таван тонн химийн бодис хурааж авч байсан бол өнгөрсөн онд 518 тонныг хурааж авсан нь түгшүүр төрүүлж байгаа аж. 

Эх сурвалж: CNN