ОХУ-ын арми өчигдөр /2023.05.29/ Киев рүү өдрийн цагаар гэнэт довтолжээ. Энэ довтолгооноос хэдхэн цагийн өмнө буюу Ням гаригаас Даваад шилжих шөнө Украины нийслэл болон бусад хот цохилтод өртөөд байсан. Киевийн төв хэсэгт Даваа гаригийн үдийн үеэр дэлбэрэлтүүд сонсогдож, агаарын довтолгооноос анхааруулах дуут дохионууд хангинаснаар хүмүүс хоргодох байранд орсон байна.

Хүүхдүүд хоргодох байр руу гүйж байгаа бичлэгийг ерөнхийлөгч Зеленский цахим сүлжээндээ нийтэлсэн. "Украин хүүхдүүд. Агаарын довтолгооноос хамгаалах дохио дуугарах тоолонд л ийм байдаг. Өдөр тутамд ийм л дүр зурагтай байна" гэж тэр бичжээ. Тэргүүн хатагтай Олена Зеленска мөн бичлэгийг нийтлээд "Шөнөжин цохилтод өртөж нойргүй хоносны дараах өглөө. Дахиад л түгшүүртэй байдал… Дэлбэрэлтийн чимээнээр хүүхдүүд хоргодох байр луу хашгиран гүйлдэж байна. Ийм байх учиргүй л юмсан" гэжээ.

Украины арми 11 искандер пуужинг устгаж чаджээ. Мөн Подильский дүүрэгт пуужингийн хэлтэрхий унасны улмаас нэг хүн эмнэлэгт хүргэгдсэн гэж Киев хотын дарга Виталий Кличко хэллээ.

ОХУ урт хугацааны туршид зөвхөн шөнөөр, үүрээр л Украин руу довтолсон. Тэгвэл энэ удаад хотын иргэд ихэнх нь гэрээсээ гарчихсан байгаа цаг үеийг дайруулж, өдрөөр довтолсон нь оросууд тактикаа өөрчилснийг илтгэнэ гэж үзэв.

Ням гаригт Киев хотын өдөр байсан. Энэ нь тэмдэглэлт баяр биш боловч хот анх үүсгэн байгуулагдсан өдрийг онцолдог уламжлалтай. Энэ өдөр ОХУ-ын арми Киев хот руу шахед дроноор довтолжээ. Украины армийн командлагч Валерий Залужныйн мэдэгдсэнээр тэд 37 далавчит пуужин, олон арван шахед дрон, нэг тагнуулын нисгэгчгүй онгоцыг устгасан байна. Оросын хэвлэлд Украины командын болон радарын постууд, нисэхийн техник хэрэгсэл, зэвсэг, сумны агуулахууд цохилтод өртсөн гэж бичжээ.

Шахед дрон нь бага ч болов хохирол учруулах хамгийн хямд арга юм. Пуужингаас 20 дахин хямд үнэтэй ийм дроныг ОХУ олон зуугаар нь худалдаж авсан.

Эх сурвалж: CNN