Украины ерөнхийлөгч Зеленский Пүрэв гаригийн өглөө АНУ-ын Жонс Хопкинсийн их сургуулийн төгсөгчдөд хандан гэнэтийн мэндчилгээ дэвшүүллээ. Тэрбээр эх орныхоо ардчиллын үнэт зүйлсийг эрхэмлэн, хүсэл мөрөөдлөө биелүүлэхийн тулд цаг хугацаа, нөөц бололцоогоо бүрэн ашиглахыг тэдэнд уриалав. Мөн Украины мөргөлдөөн нь тоо томшгүй олон залуу хүний ирээдүйд нөлөөлж, боломж, ойр дотны хүмүүсийг булаан авч байна гэлээ. 

"Цаг хугацаа бол энэ ертөнцийн хамгийн үнэ цэнтэй нөөц. Зарим хүн үүнийг эрт ухаардаг, тэд бол азтай хүмүүс. Бусад нь хэн нэгнийг эсвэл ямар нэг зүйлийг алдахаараа л хэтэрхий оройтож ухаардаг. Тиймээс цаг мөч бүрийг үр дүнтэй ашигла" гэж тэр Хопкинсын төгсөгчдөд уриаллаа. 

Түүнчлэн АНУ-ын зүгээс Украинд үзүүлж буй дэмжлэг, томоохон хөрөнгө оруулалтуудад талархал илэрхийллээ. Ерөнхийлөгч Жо Байден өнгөрсөн долоо хоногт АНУ болон Европын орнууд "F-16" сөнөөгч онгоцыг Украинд нийлүүлэх гэрээ байгуулснаа зарласан юм. 

"Украинчуудын дунд төгсч буй америк оюутнуудтай төстэй мөрөөдөл, хүсэл тэмүүлэлтэй хүн олон байгаа. Гэвч украин залуус мөрөөдлийнхөө хойноос явж чадахгүй эмгэнэлт дайныг даван туулахаас өөр аргагүйд хүрсэн гэдгээрээ ялгаатай. Өнөөдөр яг юу хэрэгтэй байгаагаа, маргааш ямар байгаасай гэж хүсч байгаагаа мэдэх ёстой" гэж Зеленский хэлсэн.

Жонс Хопкинсийн их сургуулийн ерөнхийлөгч Рон Даниэлс үг хэлснийхээ дараа Зеленскийд хүмүүнлэгийн ухааны хүндэт доктор цол олгожээ. 

Эх сурвалж: AP