Монгол Улсаас Бүгд найрамдах Хятад ард улсад суугаа Онц бөгөөд бүрэн эрхт элчин сайд Ц.Сүхбаатар, Элчин зөвлөх Ц.Батбаяр, Цэргийн атташе хурандаа Ш.Жаргалсайхан тэргүүтэй төлөөлөгчид өчигдөр Хөбэй мужийн Жанчхүү хотын Жанбэй сянь дахь Монгол-Зөвлөлтийн дайчдын дурсгалын хөшөөнд цэцэг өргөж, хүндэтгэл үзүүллээ.

Жанчхүү хотын Ардын Засгийн газрын орлогч дарга, Жанбэй сяний Ардын Засгийн газрын орлогч дарга, Жанчхүүгийн цэргийн дэд тойргийн захирагч зэрэг орон нутгийн удирдлагууд уг үйл ажиллагаанд өндөр ач холбогдол өгч, сайтар зохион байгуулсан байна. Одоогоос 65 жилийн тэртээ зүүн хойд Хятадыг чөлөөлөх дайнд Монголын цэрэг эрс амь биеэ үл хайрлан тэмцэж явсанд Хятадын удирдлагууд талархаж, тэднээр бахархаж явдгаа илэрхийлж байлаа.     

1945 онд Жанчхүүгийн даваан дээр байлдаж яваад амь үрэгдсэн Монгол, Зөвлөлтийн дайчдын алдрыг мөнхжүүлсэн Жанбэй дахь хөшөөг арчлан хамгаалж, байнга анхаарал тавьж байдагт Элчин сайд Ц.Сүхбаатар орон нутгийн удирдлагад талархал илэрхийллээ гэж Гадаад харилцааны яамны хэвлэлийн албанаас мэдээллээ.