Малайзын комедиан Нигел Нг өнгөрсөн долоо хоногт хошигнолынхоо нэг хэсгээс "Weibo" платформд байршуулжээ. Энэхүү хошигнолдоо тэр хатуу цензур бүхий Бээжингийн улс төр болон Ши Жиньпин даргын талаар ярьсан боловч өөрөө өөртөө гай дуудаж, хэд хоногийн дараа "Weibo"-гоос хөөгдсөн байна. Тодруулбал, Нигел Нг Хятадын хяналтын тухай яриад, Коммунист намаас "Намайг битгий алга болгоорой" гэж хүсчээ.

Нигел Нг нь 32 настай бөгөөд "Авга Рожер" гэх тайзны нэртэй. Тэр Куала Лумпурт төрсөн ч одоо Их Британид амьдардаг.

Тэр Мягмар гаригт бичлэгээ байршуулсан бол Бямба гаригт түүний хаягнаас шинэ пост оруулах боломжгүй болжээ. "Холбогдох хууль тогтоомжийг зөрчсөний улмаас таны хаяг хаагдлаа" гэсэн мэдэгдлээс өөр дэлгэрэнгүй зүйл түүнд ирээгүй.

Нигел Нг хошигнолоо яриж байхдаа үзэгчдийнх нь дунд Гуанжоу мужаас ирсэн хүн байгааг мэдмэгцээ "Хятад бол сайхан орон. Одоо ингэж л хэлэх ёстой биз дээ. Бүх утсыг чагнаж байгаа шүү дээ" гэж хэлжээ. Ингэж хэлэхэд нь үзэгчид инээлдсэн байна. Дараа нь тэр Гуанжоугийн үзэгчээс эрх баригчдад зориулж өөрийнх нь төлөө нэг үг хэлээч гэсэн. Тухайн үзэгч "Авга Рожер бол сайн нөхөр. Түүнийг битгий алга болгоорой" гэжээ. Тэр ярианыхаа эхэнд "Ши дарга урт наслаасай" гэж хэлж, шагнал, шийтгэлийг хослуулах аргыг хэрэглэжээ. Түүнчлэн "Тайванийг жинхэнэ улс биш. Удахгүй эх газартай нэгдэх байх" гэж хэлсэн байна.

Авга Рожерын бүрэн хэмжээний шоу зургадугаар сарын 4-нд буюу Хятадын эрх баригчдын эмзэг сэдэв болсон Тяньаньмэний цуст хядлагын ойн өдөр олны хүртээл болох төлөвтэй байна. Гэвч түүнийг ийнхүү цахим орчинд түдгэлзүүлсэн нь Хятадын эрх баригчид инээдмийн урлагийг хэрхэн үзэж байгааг харуулна. Мөн улс төрийн улаан шугамыг давсан хүмүүсийг хэрхэн шийтгэж байгаад олны анхаарлыг дахин хандууллаа.

Ардын чөлөөлөх армийн тухай хошигносон хятад комедиан Ли Хаоши хоёр сая ам.долларын торгууль төлөх болсон тухай бид өмнө нь мэдээлсэн. Ли Хаошигийн нийтлэх эрхийг ч бас "Weibo" түдгэлзүүлжээ.

Эх сурвалж: CNN