Орос, Украины хооронд энхийн зуучлагчийн үүрэг гүйцэтгэх хүнээр Хятад улс ахмад дипломатч Ли Хуйг томилсон талаар бид өмнө нь мэдээлсэн. Ли Хуй нь 2019 он хүртэл Москва дахь Хятадын Элчин сайдаар ажилласан хүн юм. Украин, ОХУ болон Европын бусад хотоор аялах түүний айлчлал өнөөдрөөс эхэлж байна. Ли Хуй Польш, Франц, Германд айлчлана гэж Хятадын Гадаад хэргийн яам мэдэгдсэн. Гэхдээ айлчлалын нарийн хуваарийг зарлаагүй. Эх сурвалжийн мэдээлснээр айлчлалын эхний цэг нь Украин байна.

Дайн эхэлснээс хойш Украинд айлчилж буй хамгийн өндөр албан тушаалтай хятад хүн нь Ли Хуй болов. Түүний айлчлалыг удаан хүлээсэн Украины сөрөг довтолгоотой давхцаж магадгүй гэж үзэж байна.

Хятадын дарга Ши Жиньпин Украины ерөнхийлөгч Зеленскийтэй утсаар ярисны дараа энэ айлчлал тохиож байна. Тэд удаан хугацаанд утга учиртай ярилцсан гэдгийг Зеленский жиргэсэн юм. Хятадын талаас танилцуулсан 12 зүйлт энхийн төлөвлөгөөнд барууныхан төдийлөн ам сайтай байгаагүй ч Ши Жиньпин энх тайвныг тогтооход төвлөрч ажиллана гэж мэдэгджээ.

Эх сурвалж: JAPAN TODAY