Сонирхогчдын боксын ДАШТ Ташкент хотноо болж, өндөрлөлөө. Нийт 5.2 сая ам.долларын шагналын сантай энэ удаагийн тэмцээнд 107 орны 538 тамирчин өрсөлдсөн бөгөөд Монгол Улсаа төлөөлөн арван тамирчин хүч үзсэн. Үүнээс  67 кг-ын жинд Б.Мишээлт хүрэл медаль, 63.5 кг-ын жинд Б.Чинзориг мөнгөн медаль хүртэж, дэлхийд нэрээ данслууллаа.

Тэртээ 2009 онд Италийн Милан хотод болсон дэлхийн аваргаас хойш Монголын ширэн бээлийтэн финалд шалгараагүй байсан юм. Харин энэ жил Б.Чинзориг алтан медалийн төлөө шалгарсан ч эзэн орны тамирчин Руслан Абдуллаевд ялагдаж, мөнгөн медалийн эзэн болов.

Энэ удаагийн дэлхийн аваргын алтан медалийг 200 мянган ам.доллар, мөнгөн медалийг 100 мянган ам.доллар, хүрэл медалийг 50 мянган ам.доллар тус тус дагалдана.

Багийн дүнгээр Узбекистан таван алт, хоёр мөнгө, хоёр хүрэл медаль хүртсэн амжилтаараа тэргүүлсэн бол тэдний араас Казахстан, Орос, Куба, Франц удаалж, Монгол долдугаар байрт шалгарчээ. Монголын боксын эрэгтэй тамирчид ийнхүү ДАШТ-ээс 13 медаль хүртлээ. Ганц алтан медалийг нь 2009 онд П.Сэрдамба хүртэж байсан бол сүүлийн мөнгөн медалийг нь 2009 онд Н.Төгсцогт, сүүлийн хүрэл медалийг нь 2019 онд Э.Цэндбаатар тус тус хүртээд байсан юм.