Цахим спортын "CS:GO”-ийн хамгийн сүүлийн Мэйжор тэмцээн Парис хотноо өчигдөр/2023.05.08/ эхэллээ. 1.25 сая ам.долларын шагналын сантай энэхүү Мэйжорт нийт 24 баг өрсөлдөж байгаа бөгөөд Ази, Номхон далайг төлөөлөн Монголын “The Mongolz”, Австралийн “Grayhound” багууд өрсөлдөж буй.

Тэмцээний эхний өдөр “The Mongolz” дэлхийн шилдэг “G2 Esports” багтай учраа таарч, 11-16 гэсэн харьцаатай ялагдсан. Монгол залуучууд тоглолтыг сайн эхлүүлсэн ч төгсгөлөө тааруу хийв. Удаах тоглолтоо Германы “GamerLegion” багийн эсрэг хийн 16-11-ээр ялалт байгуулжээ. Ийнхүү эхний өдрийн дараах байдлаар 1-1 гэсэн амжилттай явна.

Харин өнөөдөр гурав дахь тоглолтоо нэг бүсийн “Grayhound”-ийн эсрэг хийнэ. Хоёр баг яг нэг сарын өмнө Улаанбаатар хотноо учраа таарахад “Grayhound” гурван ээлжийн тоглолтод 2-1 гэж ялж байлаа.

Тэгвэл өнөөдөр “The Mongolz” хариугаа авч чадах уу? Хоёр баг хоёулаа 1-1 гэсэн амжилттай яваа. Хожсон нь 2-1 болж, “Legends” шат руу нэг алхам ойртох бол хожигдсон нь Мэйжорыг орхих хавцлын ирмэг дээр ирнэ.

Тоглолт өнөөдөр 17.00 цагаас эхэлнэ.