Японы Саппоро дахь хог цуглуулах байгууламжаас 10 сая иен олдсон хэрэг энэ оны нэгдүгээр сарын 30-нд гарч байлаа. Тодруулбал, хог цуглуулах байгууламжийн ажилтан Ниши тойрог болон Тэйн тойргоос цугларсан шатах боломжтой хогийг ангилж байгаад уг мөнгийг олжээ. Хогийн цэгээс энэ мэт сонин хачин зүйл, гайхалтай эрдэнэс олдох нь олон.

Ажилтан тэр дороо хотын захиргаанд олзоо мэдээлсэн байна. Японы хуулийн дагуу тухайн эд зүйлийн эзэн нь гурван сарын дотор ирэх боломжтой байдаг.

Энэ хугацаанд "Мөнгөө санамсаргүй унагасан байна", "Сэтгэцийн эмгэгтэй гэр бүлийн гишүүн маань мөнгийг хаяжээ" гэх мэтээр 16 хүн хандаж иржээ. Гэсэн хэдий ч эдгээр нь баримтаар нотлогдоогүй тул эцэст нь дөрөвдүгээр сарын 30-нд мөнгийг Саппоро хотын өмч болгосон байна.

Мөнгийг анх олсон ажилтанд жаахан ч гэсэн хувь өгөх ёстой гэж зарим хүн үзэж байна. "Олсон хүнд юу ч байхгүй юу? Тэр хүн зүгээр өөрөө л халаасалчих ёстой байсан юм", "Наад хүндээ бүгдийг нь өг гэж хэлсэнгүй. Гэхдээ үнэнч байсных нь төлөө шагнаач", "Миний бодлоор үүнийг Төв банкинд буцааж өгсөн нь дээр. Өөр хэн нэгэн ашиг хонжоо олж байгаа нь хачирхалтай байна", "Яагаад ийм их мөнгө хаясныг нь төсөөлөхөд л аймшигтай байна", "Саппоро манайхаас зургаан цагийн зайтай байдаг. Энэ миний мөнгө ч юм бил үү", "Хорвоогийн хамаг худалч хүн энэ мөнгийг авах гээд гараад ирлээ, инээдтэй юм", "Жинхэнэ эзэн нь мэдсэн ч чимээгүй байгаа байх. Хэлчихвэл 10 сая хаанаас ирсэн бэ гэдэг аудиттай тулгарах болно", "Олсон хүнд нь мөнгийг өгвөл ажлаа сайн хийх хөшүүрэг болно шүү дээ" гэж цахим сүлжээнд хүмүүс сэтгэгдлээ бичжээ.

Хогоо ангилахдаа сонор сэрэмжтэй байхыг Саппоро хотын захиргааны албан тушаалтан хэлсэн байна. "Энэ бол бидний иргэний үүрэг. Мөн ямар нэг үнэ цэнтэй зүйлээ санамсаргүй хогтой хольж хаясан байхыг үгүйсгэхгүй" гэжээ.

Эх сурвалж: JAPAN TODAY