Японы Ишикава мужийн Сүзү хотод өнөөдөр /2023.05.05/ 14:42 минутын орчимд 6.3 магнитудын хүчтэй газар хөдөллөө. Цаг уурын агентлагаас мэдээлснээр газар хөдлөлтийн гүн 10 орчим километрт байжээ. Гэхдээ цунамигийн анхааруулга дуугараагүй. Одоогоор хүний амь үрэгдсэн эсвэл бэртэж гэмтсэн талаар мэдээлэл алга байна.

Шиндо хэмжүүрээр авч үзвэл энэ газар хөдлөлт нь томоохон хөрсний гулгалт үүсгэж болзошгүй байна. Сүзү хот нь Токиогоос 280 гаруй км зайд орших ба Япон тэнгисийн эрэг дээрх Ишикава мужийн хойд үзүүрт байрладаг. Газар хөдлөлтийн дараах афтершокууд ч болно гэдгийг засгийн газрын ерөнхий нарийн бичгийн дарга Хироказү Мацүно анхааруулж байна.

Японы "Golden week" буюу долоо хоног үргэлжилдэг баярын амралт дөрөвдүгээр сарын 29-өөс эхэлсэн. Өнөөдөр уг амралтын сүүлийн өдөр байсан. Энэ хугацаанд Японд гадаадын болон дотоодын аялагчид дүүрэн байдаг. Газар хөдлөлтийн улмаас Нагано ба Каназавагийн хоорондын хурдны галт тэргийн хөдөлгөөнийг зогсоожээ. 

Арлын Япон орон нь газар хөдлөлтийн хүчтэй идэвхжил бүхий Номхон далайн цагираг дээр байрладаг. Тиймээс хүчтэй газар хөдлөлтөд зориулсан барилгын хатуу дүрэм журамтай. Мөн томоохон газар хөдлөлтөд бэлтгэлтэй байхын тулд онцгой байдлын сургуулилалтыг тогтмол хийдэг.

Эх сурвалж: DAILY MAIL