УИХ-ын хаврын чуулганы хуралдаанаар өнөөдөр /2023.05.04/ Хууль зүйн үндэсний хүрээлэнг татан буулгаж, парламентын дэргэдэх судалгаа сургалтын хүрээлэнд нэгтгэх тогтоолын төслийг хэлэлцэх аж. Хууль зүйн байнгын хорооны дарга Б.Энхбаяр “Маргааш УИХ-ын чуулганаар эцэслэн батлах гэж буй Хууль зүйн байнгын хороо дэмжсэн энэхүү тогтоолын төслийг УИХ-ын хэн гэдэг гишүүн санаачилсныг мэдэхгүй. Засгийн газар санаачлаагүй.

УИХ-аар хэн ч санаачилж УИХ-д өргөн мэдүүлээгүй шийдвэр гардаг байж таарахгүй. Энэ бол хуулийн хулгай мөн” гэж байр сууриа илэрхийлсэн байна. Дээрх үйл явдалтай холбогдуулан Монголын хуульчдын холбооноос мэдэгдэл гаргаж, тогтоолын төслийг дэмжихгүй байх талаар гишүүдэд мэдэгдэл гаргажээ.

Мөн энэ талаар хуульч Б.Гүнбилэг "Хууль зүйн үндэсний хүрээлэнг татан буулгаж байгаа гэнэ. Маш харамсалтай. Үнэхээр ядарсан арга. Итгэж байсан зүйлс аажмаар биш огцом нурж байна. Уг нь бол ХЗҮХ-нг парламентын судалгааны төвд биш. Төвийг хүрээлэнд нэгтгэвэл ОУГ зөрчихгүй юм. УИХ-ын харьяа Хууль зүйн үндэсний хүрээлэн болно. Яамнаас их хурал руу очиж статус дээшилж байгаа гэсэн үг" гэж олон нийтийн сүлжээнд байр сууриа илэрхийлсэн байна.