“Эрдэнэ ресурс девелопмент корпораци” (TSX:ERD|MSE:ERDN) Монгол Улсын баруун өмнөд хэсэгт, Хөндий эрдсийн дүүрэгт, Баян Хөндий алтны төслөөс зүүн зүгт 35 км-т байрлах өөрийн 100 хувь эзэмшлийн Зуун Мод молибден-зэс порфирийн төсөл дээр өрөмдлөгийн хөтөлбөр эхлүүлэв.

“Зуун мод” төслийн NI 43-101 тайлангийн хэсэгт эдийн засгийн судалгаа гүйцэтгэхэд зориулан их хэмжээний хайгуул, металлургийн судалгаа, инженерчлэл болон гидрогеологийн ажлууд хийжээ. Хоёрдугаар улирлын энэхүү хөтөлбөр дээрх ажлуудыг үргэлжлүүлэхтэй зэрэгцэн нэмж 4000 метр алмазан өрөмдлөгийн хөтөлбөр гүйцэтгэн, техникийн судалгаанд шаардлагатай өгөгдлүүдийг шинэчлэх юм байна. Эхний үе шатанд 2500 метр өрөмдлөг гүйцэтгэх ба өнөөгийн нөөцийн талбайг хүрээлэн, шинэ бүсүүдийг тодорхойлох зорилготой аж. Цаашид гүйцэтгэх томоохон хэмжээний эрдэсжилт тэлэх өрөмдлөгийн хөтөлбөрөөр нөөцийг нэмэгдүүлэх боломжтой гэжээ.

“Эрдэнэ ресурс”-ийн ерөнхийлөгч, гүйцэтгэх захирал Петер Акерли “Бид 2023 оны өрөмдлөгийн хөтөлбөрийг Ази тивийн хамгийн том хөгжүүлэлт хийгдээгүй молибден-зэсийн ордуудын нэг болох “Зуун мод” төслийн өрөмдлөгөөр эхлүүлж байгаадаа баяртай байна. Тус орд томоохон “Зуун мод” порфирийн цогцолборт багтдаг ба судалгаа хийгдээгүй зэс-молибденийн хэд хэдэн бүс тодорхойлсон. Эрдэсжилт бүх чиглэлд нээлттэй байгаа нь ирээдүйд нээлт хийх боломжуудыг нэмэгдүүлж байна.

Монгол Улс хамгийн том эрдсийн хэрэглэгч зах зээлтэй хил залгаа, стратегийн чухал байршилд оршдог. Түүнээс гадна өндөр чанарын гангийн үйлдвэрлэлийн өсөлт, ногоон эрчим хүчний шилжилтийн үед Монгол Улсын хөгжиж буй дэд бүтэц нь урт хугацааны төсөл хөгжүүлэхэд чухал ач холбогдолтой. Молибденийн зах зээл дээрх нийлүүлэлт буурч, зэсийн эрэлт нэмэгдэх төсөөлөлтэй байгаа энэ үед манай голлох төсөл Баян Хөндий алтны төслийн хажуугаар “Зуун мод” төслийг хөгжүүлэхэд тохиромжтой үе гэж үзэж байна” гэжээ.

“Зуун мод” молибден-зэсийн төсөл 0.04 хувийн захын агуулга бүхий тооцооллоор 0.057 хувь молибден, 0.069 хувь зэсийн дундаж агуулга бүхий 218 сая тонн баттай ба бодитой нөөц тооцоологдсон. Энэ нь 273.5 сая фунт молибден агуулсан, 330.7 сая фунт зэсийн металлтай тэнцэх аж. Түүнээс гадна 0.052 хувь молибден, 0.065 хувь дундаж зэсийн агуулга бүхий 138 сая боломжтой нөөц тооцоологдсон нь 157.7 сая фунт молибден, 197.7 сая фунт зэсийн металлтай тэнцэх юм байна.