ОХУ-ын дайн, Капитолын үймээн зэрэг олон улсын чанартай чухал сэдвүүдийг хөндөж, “Fox News” сувгийн өнгө аясыг тодорхойлдог байсан алдарт хөтлөгч Такер Карлсон ажлаасаа гарсан нь хэвлэл мэдээллийн салбараар тогтохгүй улс төрийн хүрээллийнхнийг хүртэл шуугиулав. Бид энэ удаагийн ХҮМҮҮС буландаа АНУ-ын улс төрийн хамгийн хүчтэй дуу хоолой гэж нэрлэгддэг Такер Карлсоныг онцолж байна.

УЛСТӨРЧ, СЭТГҮҮЛЧ ААВЫН ХҮҮ

Такер Карлсон 1969 онд АНУ-ын Калифорниа мужид айлын ууган хүү болж мэндэлжээ. Түүний аав Дик Карлсон нь мөн сэтгүүлч мэргэжилтэй бөгөөд Хүйтэн дайны сүүлийн зургаан жилд “Америкийн дуу хоолой” радиод захирлаар ажилласан хүн юм. Дик Карлсон нь улс төр болон хэвлэл мэдээллийн салбарт багагүй танигдсан нэгэн. Тэр 1984 онд Сан Диего хотын захирагчийн сонгуульд нэр дэвшсэн ч бүтэлгүйтэж байсан түүхтэй. Өдгөө Олон нийтийн өргөн нэвтрүүлгийн корпорацийн ерөнхийлөгч, Сейшелийн арлууд дахь АНУ-ын Элчин сайдаар тус тус ажилладаг

Харин ээж Лиза МкНеэр нь чөлөөт уран бүтээлч байсан. Такер Карлсоны хоёр дүү нь Бүгд найрамдах намд харьяалагддаг.

Түүний эцэг эх хоёр есөн жил хамт амьдарсны эцэст 1976 онд салжээ. Хүүхдүүдээ асран хамгаалах эрхийг аав нь авч, ээж нь Франц руу нүүсэн байна. Салалтаас гурван жилийн дараа аав нь Патрисиа Кэролэйн Свансон гэх эмэгтэйтэй гэрлэсэн. Энэ эмэгтэй нь “Swanson Enterprises”-ийн өв залгамжлагч Гилберт Карл Свансоны охин бөгөөд сенатор Ж.Уильям Фулбрайтын зээ юм.

Карлсон дунд боловсролоо Род-Айлендын Миддлтаун дахь Гэгээн Жоржийн сургуульд эзэмшсэн. Энд тэр ирээдүйн эхнэр Сюзан Эндрюстайгаа танилцсан байна. Эхнэр нь сургуулийн захирлын охин байжээ. Улмаар Коннектикут мужийн Хартфорд дахь Тринити коллежид түүхийн ухаанаар бакалаврын зэрэг хамгаалсан. Коллежоо төгсөөд Карлсон Тагнуулын төв агентлагт ажилд орохоор хичээсэн боловч чадаагүй. Тиймээс аавынхаа зөвлөгөө дэмжлэгтэйгээр сэтгүүлч болохоор шийджээ.

ХЭВЛЭЛИЙН САЛБАРЫН АКУЛ

Карлсоны сэтгүүлчийн карьер “Policy review” сэтгүүлд баримт нягтлагчаар ажилласнаар эхэлсэн. Үүний дараа “Arkansas Democrat-Gazette” сонин, “The weekly standard news” сэтгүүлд тус тус ажиллав.

Улс төрийн томчуудтай ярилцаж эхэлсэн нь 1999 он. Тодруулбал, “Talk” сэтгүүлд тэр Жорж Буштай ярилцсан бөгөөд Буш тухайн үед Техас мужийн захирагч байсан. Эндээс тэр хэвлэл мэдээллийн салбарын томоохон төлөөллүүдэд ажиллаж, бичиж эхэлжээ. Тухайлбал, “New York”, “Reader’s Digest” сэтгүүлд тоймчоор, “CNN”, “PBS”, “The new republic”, “The wall street journal”, “ The Daily beast” зэрэг сэтгүүлд сэтгүүлчээр ажилласан. Түүнийг хэвлэл мэдээллийн салбарт ажилласан бүхий л хугацаандаа сэхээтнүүдийн дуу хоолой болж явсан гэж “Politico” сэтгүүлийн үүсгэн байгуулагч Жон Ф.Харрис дүгнэсэн байдаг.

Карлсон нь бусад сэтгүүлчдийн мэдээллийн эх сурвалж байсныг “New York Times ”-ийн сэтгүүлч Бэн Смит мөн хэлж байв. Ялангуяа Дональд Трампийг шүүмжилж бичдэг сэтгүүлчдийн хувьд энэ нь хамаатай.

“FOX NEWS”-ЭЭС Ч ИЛҮҮ ТОМ ХҮН

“Fox News” агентлаг Такер Карлсонтой “салах тохиролцоонд хүрсэн” гэснээс өөр нэмэлт тайлбар өгөөгүй. Такер Карлсоны сүүлийн эфир өнгөрсөн Баасан гаригт буюу дөрөвдүгээр сарын 21-нд байв. Тэр шоугаа дуусгахдаа “Даваа гаригт эргээд уулзья” гэж хэлсэн боловч тийм зүйл болсонгүй. Даваа гаригийн шоуг Брайан Килмид хөтөлсөн юм. Брайан Килмид шоуны үеэр “Такер Карлсоныг яваад өгсөн гэж та нар сонссон биз дээ. Түүнд хамгийн сайн сайхныг хүсье. Бид маш сайн найзууд. Цаашдаа ч энэ хэвээр байх болно” гэж хэлжээ.

Карлсон ажлаасаа гарсан тухай мэдээний дараа хэдхэн секундын дотор “Fox” корпорацийн хувьцаа дөрвөн хувиар буурч, арилжааны төгсгөлд 2.9 хувиар унасан байна.

Эндээс харахад Такер Карлсон гэдэг хүн “Fox News”-ээс ч илүү томорчээ. “Түүний гэнэтийн шийдвэр зөвхөн “Fox News”-ээр тогтохгүй Бүгд найрамдах намын хувьд ч ноцтой үр дагавар дагуулж байна” гэж “Fox” корпорацийн тухай ном бичиж буй Брайн Стелтер хэллээ.

“Tucker Carlson Tonight” нэвтрүүлгийг тэр 2016 оноос хойш хийжээ. Уг нэвтрүүлэг нь тухайн жилдаа 3.7 сая үзэгчид хүрч, “Fox News”-ийн хамгийн өндөр үзэлттэй шоугаар шалгарсан байна. Улмаар 2017 онд кабелийн телевизийн хамгийн өндөр үзэлттэй хөтөлбөр болжээ. 2020 оны аравдугаар сард шоуны үзэгчийн тоо 5.3 сая хүрсэн.

СОНИРХОЛТОЙ БӨГӨӨД ХҮЧТЭЙ НЭР ДЭВШИГЧ

Орчин цагийн улс төрийн хамгийн чухал бөгөөд хүчтэй дуу хоолой болсон Такер Карлсоныг 2024 онд АНУ-ын ерөнхийлөгчийн сонгуульд нэр дэвшиж магадгүй гэх таамаглал гарч ирлээ.

Бүгд найрамдах намаас нэр дэвшиж буй улстөрч Вивек Рамасвами түүнийг өрсөлдөөнд өнгө нэмнэ гэж үзэж буйгаа хэлжээ. "Хийх ёстой юм шиг санагдаад байвал хийсэн нь л дээр. Гэхдээ миний бодлоор Такер Карлсон ерөнхийлөгч болчих юм бол манай улсад л тустай" гэв.

Айовагийн Бүгд найрамдах намын ахмад стратегич Дэйв Кочел хэлэхдээ "Такер Карлсон нэр дэвшинэ гэдгээ зарлах үед зарим хүний царай ямар болохыг хармаар байна. Тэд ч ёстой хараалаа хэлэх байх даа. Тэр чинь 3.5 сая үзэгчтэй хүн шүү дээ. Юу юунаас илүү түүний шоу бол соёлын томоохон үзэгдэл. 20 сая хүн түүнийг сайн мэднэ. Магадгүй энэ 20 сая нь бүгдээрээ улс төр сонирхогч, ажиглагчид шүү. Би лав болохгүй зүйл байхгүй гэж бодож байна. Бид чинь урьд хожид байгаагүй галзуу цаг үед амьдарч байна шүү дээ" гэжээ.

Харин Нью Хэмпширийн Бүгд найрамдах намын стратегич Дэйв Кэрни хэлэхдээ "Трамп түүнд ямар хоч өгөх бол доо? Такер бол Трампын амжилтыг хамгийн сайн буруутгаж чадах хүн" гэв.

Бүгд найрамдах намын стратегич Алекс Конант хэлэхдээ Такер Карлсон "FoxNews"-ээс ямар тохироотой гарснаас их зүйл шалтгаална гэж үзэж байна. "Ерөнхийлөгч нар ихэнх тоглолтоо энэ сувгаар хийдэг. Нарийн яривал Карлсоны шоугаар дамжуулан хийдэг. "FoxNews" суваг Такер Карлсонд кампанит ажлаа сурталчлах орон зай олгохгүй бол энэ нь жинхэнэ сорилт болно" гэлээ.

Бүгд найрамдах намын стратегич Бэт Миллер “Галзуу сонсогдож байгаа хэдий ч бид илүү галзуу зүйлсийг харж л байсан. Такер Карлсон ч хүчтэй нэрийн хуудастай хүн дээ. “Fox News”-д ажиллах хугацаандаа тэр сууриа тавьчихсан. Нэвтрүүлгийн үзэгчид түүнд саналаа өгнө” гэж хэлсэн байна.

Консерватив улс төрийн үйл ажиллагааны хорооны дэд дарга Чарлье Героу хэлэхдээ “Түүнд дагагчид бий, нэр төр бий. Өөрөө хүсэх л юм бол үндэсний хэмжээний кампанит ажил зохион байгуулах боломж ч бий гэдэгт эргэлзэхгүй байна. Тэр чинь Дональд Трампаас ч илүү зурагтаар гардаг хүн” гэжээ.

Трампийн эсрэг Линкольн төслийн үүсгэн байгуулагч Майк Мадрид хэлэхдээ “Тэр бол Дональд Трампийг ялж чадах цор ганц хүн. Бүгд найрамдахчууд юуг эсэргүүцэж байгааг хамгийн сайн тодорхойлох хүн бол Такер Карлсон. Түүнд мөрийн хөтөлбөр бий, үзэгч бий, нөлөөлөл бий. Зарим талаараа тэр Трампийн 2015 оны үетэй адил байна” гэжээ.

Эх сурвалж: POLITICO, AP, WIKIPEDIA