Хуучин ЗХУ-ын бүрэлдэхүүний орнууд тусгаар улс биш гэв

Хятад улсаас Францад суугаа Элчин сайд Лу Шае хуучин Зөвлөлт холбоот улсын бүрэлдэхүүнд байсан орнуудын тусгаар тогтнолд эргэлзсэн байр суурийг илэрхийлснийг Европын улсууд хүчтэй эсэргүүцэв. Элчин сайдын өнгөрсөн Баасан гаригт Францын "LCI" телевизэд өгсөн ярилцлага нь Орос, Украины дайнд төвийг сахиж, зуучлагчийн үүрэг гүйцэтгэхээр хичээж буй Бээжингийн хүчин чармайлт болон Европын холбоотой харилцаагаа сайжруулах оролдлоготой зөрчилдөв.

Сэтгүүлч түүнээс "Украины газар нутгийн нэг хэсэг болох Крым хойгийг 2014 онд ОХУ булаан авсан гэж үздэг үү?" гэж асуухад дараах хариултыг өгчээ. Тэрбээр хэлэхдээ, "Хуучин ЗХУ-ын бүрэлдэхүүний зарим орон олон улсын эрх зүйн хүрээнд үр дүнтэй статустай байдаггүй. Тэдний тусгаар тогтносон улсын статусыг хэрэгжүүлэх олон улсын гэрээ байхгүй" гэж хэлсэн байна.

Түүний ярилцлага цацагдсаны дараа Латви, Литва, Эстони зэрэг орнуудын гадаад хэргийн сайд нар өөрийн улсад суугаа Хятадын дипломат төлөөлөгчдийг дуудан уулзаж, тайлбар авчээ. Эдгээр гурван орон нь 1991 онд ЗХУ задарсны дараа тусгаар тогтнолоо олсон байдаг.

Хятад улс, Европын холбооны хооронд улс төр, эдийн засгийн харилцааг сайжруулах хүчин чармайлтын хүрээнд өнгөрсөн долоо хоногт Францын Ерөнхийлөгч Эммануэль Макрон, Европын комиссын ерөнхийлөгч Урсула фон дер Лейен, Германы Гадаад хэргийн сайд Анналена Баербок нар Бээжинд айлчилсан.

Харин энэ талаар Францын Гадаад хэргийн яам Элчин сайдын хэлсэн үгийг анхааралдаа авч, Бээжингийн байр суурьд "сэтгэл зовниж байна" гэж мэдэгдэв. Мөн Элчин сайдын тайлбарт Хятадын засгийн газраас албан ёсоор тайлбар өгөхийг хүссэн байна.

ЭХ СУРВАЛЖ: BLOOMBERG