Ньюс агентлаг энэ долоо хоногт өрнөсөн онцлох үйл явдлыг тоймлон хүргэж байна.

АРДЧИЛСАН НАМ НЭГДЭВ

С.Эрдэнэ  гурван жил “эрдэнэ” мэт хадгалж явсан намын тамгаа Л.Гантөмөрт өөрийн биеэр, хадаг яндартай хүлээлгэж өгснөөр АН-ын хуваагдалд цэг тавигдав. Ардчилсан намын тамганы маргаан долоон жил үргэлжилсний эцэст ийнхүү эцэслэгдэв.  Ардчилсан намын маргаан 2016 оны сонгуулийн дараагаас эхэлсэн гэж   үздэг. Тус сонгуульд 35 суудалтай эрх барьж байсан намаа ялагдалд хүргэсэн З.Энхболдоос  тамга С.Эрдэнийн гарт шилжиж  ирсэн. Дараа нь 2020 оны сонгуульд Ардчилсан нам ялагдал хүлээсэн ч С.Эрдэнэ тамгаа шилжүүлж өгөхгүй будлиантаж явсаар энэ долоо хоногт ийнхүү эцэслэгдэв.

2023 оны нэгдүгээр сард Ардчилсан намын ҮБХ хуралдаж, Л.Гантөмөр 152 гишүүний саналаар Ардчилсан намын даргаар сонгогдсон. Гэвч гэрчилгээ нь Х.Баттулгад, тамга нь С.Эрдэнэд байсан гэх. Харин Ардчилсан нам Монголын ардчиллын эцэг, ардчиллын удирдагч С.Зориг агсны төрсөн өдрөөр эвлэлдэн нэгдсэнээ зарлалаа.

"ХӨГЖЛИЙН БАНКНЫ 133 ЗЭЭЛДЭГЧ УЛС ТӨРИЙН ХАМААРАЛТАЙ БАЙНА"

Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар Хянан шалгах үүрэг бүхий түр хорооны тайланг танилцуулав.

Улмаар дараах дүгнэлтийг гаргажээ. Үүнд:

1. Хөгжлийн банкнаас санхүүжүүлсэн төсөл хөтөлбөрийн хувьд 18.3 хувь нь зориулалтын дагуу буюу зээлийн гэрээнд заасны дагуу зарцуулалтыг хийсэн. 74.2 хувь нь зориулалт бүрэн бус буюу зориулалтын дагуу ашиглаагүй, 7.4 хувь нь зээлийг зуун хувь зориулалт бусаар ашигласан, 0.3 хувь нь нягтлах боломжгүй буюу зээлийг бэлэн зарлагын гүйлгээгээр зарцуулалтыг хийсэн байна.
2.  Хөгжлийн банкны шууд зээлдэгч 77, арилжааны банкаар дамжуулан зээлдэгч 2542, Засгийн газарт шилжүүлсэн багцын 355 төсөл хөтөлбөрийг гүйцэтгэгч 279 компани, Хөгжлийн банкны охин компаниудаас санхүүжүүлсэн 42 ээлдэгч нийт 3000 гаруй зээлдэгчийн идэвхтэй, идэвхгүй хувьцаа эзэмшигч, өмнөх ба одоогийн гүйцэтгэх удирдлага, эцсийн өмчлөгч нарт бүртгэлтэй хуулийн этгээдийн мэдээллийг, улс төрийн хамаарлын хүрээлэлтэй тулгаж нягтлахад 125 хуулийн этгээд 8 иргэн нийт 133 зээлдэгч улс төрийн хамааралтай байна. Улс төрийн хамааралтай зээлдэгч нар нь Хөгжлийн банкнаас нийтдээ 1.5 их наяд төгрөгийн дүн бүхий зээл авсан байгаа нь тус банкны нийт олгосон 7.5 их наядын зээлийн 20 хувийг эзэлж байна.
3. Хөгжлийн банкнаас санхүүжүүлсэн төсөл хөтөлбөрийг олгохдоо хууль бодлого журмыг хангасан эсэх нийцлийг шалгахад хуулийн зорилттой нийцсэн төсөл 33 хувь, бүрэн бус нийцлэлтэй төсөл 49.5 хувь, нийцээгүй төсөл 17.5 хувийг тус тус эзэлж байна.
4. УИХ-ын хянан шалгах хороо байгуулагдаж ажилласнаас хойш зээлдэгчид зээлийн эргэн төлөлтөө идэвхжүүлсэн нь 2022 оны дөрөвдүгээр сарын 14-ны өдрөөс 2023 оны гуравдугаар сарын 31-ны өдрийн хооронд нийтдээ 1.8 их наяд төгрөгийн эргэн төлөлт хийгдсэнээс харагдаж байна.
5. Хөгжлийн банкинд 2011 оноос хойш ажиллаж байсан гүйцэтгэх удирдлагын баг нь мөнгөн хөрөнгийн зохистой удирдлагыг хэрэгжүүлээгүйгээс тухайн үеийн зах зээлийн хүүгийн хэмжээгээр харьцуулан тооцоолоход 120 гаруй тэрбум төгрөгийн алдагдсан боломжийн зардал үүсгэж, банкны ашигт ажиллагаанд сөргөөр нөлөөлсөн байна.

"ОЮУТОЛГОЙ"  ХХК-ИЙН МОНГОЛ ТАЛЫН ТУЗ-ИЙН ГИШҮҮНЭЭР Ж.ТАНЫГ ТОМИЛОВ

Засгийн газрын ээлжит хуралдаанаар "Оюутолгой"  ХХК-ийн Монгол талын ТУЗ-ийн гишүүнээр Ж.Таныг томилжээ. "Оюу толгой" ХХК"-ийн ТУЗ-ийн гишүүн Н.Багабандийг өнгөрсөн долоо хоногт чөлөөлсөн бөгөөд түүний оронд Ж.Таныг томилж байгаа аж. Тэрбээр Итали Улсад суугаа Онц бөгөөд Бүрэн Эрхт элчин сайд Ц.Жамбалдоржийн охин юм байна.

Тэрбээр дэлхийн номер нэг Харвардын их сургуульд бакалаврын зэрэг хамгаалсан Монголын анхны төгсөгч бөгөөд Английн алдарт Оксфордын их сургуулиас магистрын зэрэг хүртсэн.