“Авто тээврийн үндэсний төв” ТӨҮГ-аас тээврийн хэрэгслийн шинэчилсэн бүртгэл, үзлэг тооллогыг зохион байгуулж буй. Улсын хэмжээнд өнөөдрийн байдлаар 1,138.337 тээврийн хэрэгсэл бүртгэлтэй байгаа бол орон нутгийн хэмжээнд нийт 130236 тээврийн хэрэгсэл шинэчилсэн бүртгэлд хамрагдах ёстой аж.

2023 оны дөрөвдүгээр сарын 19-ний өдрийн байдлаар нийт 11146 тээврийн хэрэгсэл буюу 8.6 хувь нь  шинэчилсэн бүртгэлд хамрагдсан байна. Үүнээс өмчлөгчийн мэдээллийг шинэчилсэн 4948, техникийн үзлэгт хамрагдсан 2579, хасуулах хүсэлт өгсөн 2335, журмын хүрээнд хассан 1351, худалдах худалдан авах гэрээ, итгэмжлэлээр тээврийн хэрэгслээ бусдад шилжүүлсэн боловч худалдан авсан иргэн өөрийн нэр дээр бүртгэл хийлгээгүй 696 тээврийн хэрэгсэл байгаа аж.

2022 оны жилийн эцсийн байдлаар нийт 1,264,000 тээврийн хэрэгсэл бүртгэлийн санд бүртгэлтэй байсан. Үүнээс нийслэлд 72001, орон нутагт 90007 нийт 162008 тээврийн хэрэгсэл нь татвар, даатгал төлдөггүй, техникийн хяналтын үзлэгт ороогүй тул улсын бүртгэлээс хасна гэсэн судалгаа гаргасан.

Энэ дагуу Зам, тээврийн хөгжлийн яамны Авто тээврийн бодлогын хэрэгжилтийг зохицуулах газраас ирүүлсэн чиглэлийн хүрээнд 150647 тээврийн хэрэгслийг бүртгэлийн сангаас хассан бөгөөд өмчлөгчийн хүсэлтээр 4972 тээврийн хэрэгслийг хасчээ.

Б.ЖАРГАЛ