Бангкок хотын “Лумпини” цэнгэлдэх хүрээлэнд өчигдөр (2023.04.21) Азийн холимог тулааны "One championship" холбооны "ONE Lumpinee-13" арга хэмжээ болов. Тус тэмцээнд "Road to ONE Mongolia" шоуны ялагч, "MGL-1" Холбооны аварга, "Team Tunga" баг, "Шандас ММА" клубын тамирчин Баатархүүгийн Энх-Оргил анхны тулаанаа Филиппин улсын тамирчин Адонис Севилленотой хийсэн.

Монгол Улсын тамирчин гурван үеийн турш илүүрхэж, шүүгчдийн саналаар ялалт байгуулав.

“ONE Championship” холбооны албан ёсны "Road to ONE: Mongolia" реалити шоу өнгөрсөн оны арваннэгдүгээр сард Монгол Улсад анх удаа зохион байгуулагдсан. Тус шоуд Б.Энх-Оргил ялснаар “ONE Championship” холбоотой 100 мянган ам.долларын гэрээ хийх эрхтэй болсон билээ. Энэ дагуу тэрбээр Тайландын нийслэл Бангкок хотод болсон "ONE Fight Night 9"-ийн үеэр олон улсын дэвжээнд анх удаа ийн гарчээ.

Өдгөө 34 настай Б.Энх-Оргил холимог тулаанаар 7 ялж, 2 ялагдсан үзүүлэлттэй байна.

Тэрбээр цахим хуудастаа "Талархал" "Оюутолгой" ХХК, Shaft Operations & UG Logistics, Deck team хамт олон, уухайлан дэмжсэн тулаан сонирхогчиддоо баярлалаа. Тулаанд оролцох боломжоор хангасан "Steppe arena" П.Цагаан, Mgl Mgl, Zolboo Bo, Bataev Mongolia, Batmunkh GO, Erdene-Ochir Tamir, Suvd Tamir, Narantungalag Jadambaa, бэлтгэл хангасан Shandas MMA, Team tungaa, клубын дүү нар, гэр бүлийнхэн, Та бүхэнд маш их баярлалаа" гэж бичжээ.

Б.ЖАРГАЛ