Үндэсний статистикийн хорооноос мэдээлснээр, төгрөгийн хадгаламж энэ оны гуравдугаар сарын эцэст 13.1 их наяд төгрөг болж, өмнөх сарынхаас 1 хувь буюу 129.2 тэрбум төгрөгөөр өсч, өмнөх оны мөн үеийнхээс 4.5 хувь буюу 620 тэрбум төгрөгөөр буурчээ.

Төгрөгийн хадгаламжийн 11.8 (89.9 хувь) их наяд төгрөг нь иргэдийн, 1.3 (10.1 хувь) их наяд төгрөг нь аж ахуйн нэгж, байгууллагынх юм байна.

Валютын хадгаламж 6 их наяд төгрөг болж, өмнөх сарынхаас 176.9 (3.1 хувь) тэрбум, өмнөх оны мөн үеийнхээс 1.7 (39.1 хувь) их наяд төгрөгөөр өсчээ.

Ханшийн хувьд, Монголбанкаас зарласан төгрөгийн ам.доллартай харьцах сарын дундаж ханш энэ оны гуравдугаар сард 3524.98 төгрөг болж, өмнөх оны мөн үеийнхээс 623.15, өмнөх сарынхаас 16.92 төгрөгөөр суларсан байна.

Төгрөгийн юаньтай харьцах сарын дундаж ханш дээрх сард 511.39 төгрөг болж, өмнөх оны мөн үеийнхээс 54.14 төгрөгөөр суларч, өмнөх сарынхаас 2.41 төгрөгөөр чангарчээ.

Төв банкаас зарласан төгрөгийн рубльтэй харьцах сарын дундаж ханш энэ оны гуравдугаар сард 46.26 төгрөг болж, өмнөх оны мөн үеийнхээс 18.42 төгрөгөөр суларч, өмнөх сарынхаас 1.89 төгрөгөөр чангарсан байна.

Б.ЖАРГАЛ