Хэсэг эрдэмтэд хүний нүдний харааг хэвийн байдалд нь оруулах боломжийг бий болгохоор биосинтетик нүдний эвэр бүрхэвч бүтээж, 10 өвчтөний нүдэнд  суулгаж, туршилт хийсэн тухай Science Translational сэтгүүлд нийтлэл хэвлэгджээ.

Канад, Швед улсын эрдэмтдийн хийсэн судалгаагаар биосинтетик нүдний эвэр бүрхэвч нь өвчтөний нүдний харааг нөхөн сэргээх, нүдний торлогт учирсан гэмтлүүдийг эдгээж, хүндийн харааг сайжруулдаг болохыг тогтоосон байна.

Зохион бүтээгчдийн тайлбарласнаар лабораторийн орчинд гарган авсан эвэр бүрхэвч гэмтэлд өртсөн нүдний мэдрэлийн судсуудыг өдөөж, гэмтсэн эд эсийг сэргээн донорын эвэр бүрхэвчтэй нэгэн адилаар хүний нүдийг хэвийн байдалд буцаан оруулдаг ажээ.

Канадын Оттавагийн Клиникийн эмнэлгийн эрдэм шинжилгээний Институтын доктор Мэй Гриффит “Клиникийн энэхүү судалгаа чухал ач холбогдолтой юм. Учир нь хиймэл аргаар үйлдвэрлэн гаргасан нүдний эвэр бүрхэвчийг хүний нүдэнд байрлуулж, нүдний торлогийн гэмтсэн эд эсийг сэргээн эмчилж болохыг анх удаа нотлон харуулж байгаа юм” гэж онцлон хэлсэн байна. Доктор Гриффитийн яриснаар судалгааг цаашид эрчимтэй үргэлжлүүлэх юм бол донорын нүдний эвэр бүрхэвч хүлээж буй сая сая өвчтөний нүдний зовиурыг арилгаж, хэвийн хараатай болгох боломж бий болно гэсэн аж.

Зохион бүтээгчдийн тайлбарласнаар дэлхийн хэмжээнд нүдний эвэр бүрхэвчийн донорын олдоц ховор байдгаас шалтгаалан жил бүр сая сая хүн хараагүй болж, сохорч байгааг дурджээ. Хүн төрлөхтний харах чадвар нь эвэр бүрхэвчээс хамааралтай бөгөөд хүний нүдний гадаргууг нэвт харагддаг тунгалаг бүрхэвч болон бүрхэж  байдаг ба тэр нь нүдэнд туссан гэрлийг хүлээн авч, тор бүрхэвч рүү дүрс хэлбэрийг тодруулахаар тусган дамжуулдаг байна. Энэхүү тунгалаг бүрхэвч маш эмзэг тул аливаа халдвар, гэмтэлд амархан өртөж гэмтдэг ажээ.
Эрдэмтдийн хүний биеэс гарган авсан уургийн үндсэн дээр бүтээсэн энэхүү хиймэл биосинтетик эвэр бүрхэвч нь донор олдохгүй зовж шаналж буй өвчтөнүүдийн итгэл найдвар болж байгаа юм. Нөгөө талаар шилжүүлэн суулгасан донорын эвэр бүрхэвч нь донор хүний элдэв өвчнийг халдаах аюулыг агуулж байдаг байна.

Дээрхи эрдэмтэд 10 өвчтөнд биосинтетик эвэр бүрхэвчийг нүдэнд нь байрлуулж, ямар дүнд хүрсэн талаар дүгнэлтээ гаргажээ.  Хоёр жилийн дараа  9 өвчтөний нүдний эд эс, мэдрэлийн судсууд хэвийн байдлаар тархан ургаж, нүдний торлогийг бүрэн хучсан ажээ.

Нүдний мэс засалд орсон 10 өвчтөний зургаагийн хараа бүрэн сайжирч, хэвийн байдалд орсон байна.

Гриффитийн хамтран зүтгэгч доктор Пер Фагерхольм “Гарсан үр дүнд бид сэтгэл маш хангалуун байна. Цаашид улам шинэлэг, сайн биоматериал бүтээж, мэс заслын технологийг улам төгөлдөржүүлэхээр ажиллах болно” гэж ярьжээ.

Эх сурвалж: EFE
Бэлтгэсэн Д.Пунцаг